UWiaan Mulder wamaProteas ushiye abantu bephikisana ‘ehlonipha’ uLara
SIHLE NGUBO
Sisadida abaningi abalandela ikhilikithi emhlabeni isinqumo sikaWiaan Mulder weNingizimu Afrika, oyeke ithuba lokwephula irekhodi likaBrian Lara lama-run angu-400 ngabomu.
AmaProteas abhekene neZimbabwe kwiTest yesibili eQueens Sports Club kwaBulawayo, eZimbabwe. Umdlalo uqale ngeSonto.
Osukwini lwesibili kwi-innings yokuqala ngoMsombuluko, iqembu lakuleli lishaye into ecokeme kakhulu kanti bekubhoke yena uMulder obelishaya liphaphatheke ibhola.
Lo mdlali uyena ongukaputeni njengoba engekho uTemba Bavuma olimele, noKeshiv Maharaj obengukaputeni kwiTest yokuqala kodwa kwaphela umdlalo eselimele.
UMulder uphule irekhodi likaGraeme Smith njengokaputeni wamaProteas ebelihleli ku-277.
Akugcinanga lapho njengoba ephinde wephula irekhodi likaHashim Amla elingu-311, kwacaca ukuthi uzowahlephula wonke abephambi kwakhe.
AmaProteas aye ukuyodla ilantshi ena-626/5 kanti uMulder ubesehlanganise ama-run angu-367.
Lo mdlali ubesedinga ama-run angu-33 kuphela ukuze ephule irekhodi likaLara lama-run angu-400 alenze ebhekene ne-England ngo-2004.
Kube nokumangala ngesikhathi sezibuya elantshini kuvela ukuthi uMulder usekhethe ukuthi iNingizimu Afrika iyeke ukubhetha ngoba isihlanganise ama-run enele, yadedela iZimbabwe.
Ithuba eliyingqayizivele kangaka lokwephula irekhodi lomhlaba, aliyeke kanjalo nje uMulder?
Echaza ngalokhu uthe: “UBrian Lara uyinkakha, kumfanele ukuphatha leli rekhodi.”
Umbuzo omkhulu uthi kanti amarekhodi awenzelwe yini ukuthi ephulwe, nokwenza umdlalo ube mnandi?
Abathandi bekhilikithi behlukene phakathi ngesinqumo sikaMulder.
Kukhona ababona enze kahle ngokuhlonipha uLara, kanti abanye (ikakhulukazi bamaProteas) bacasukile ngesenzo sakhe.
