Omataniswa nokuqeqesha iChiefs uqondiswe ubugwegwe eqenjini lakhe
SIHLE NGUBO
Umqeqeshi weCR Belouizdad, yase-Algeria, uSead Ramovic, ungomunye walabo abamataniswa nokuqeqesha iKaizer Chiefs ngesizini ezayo.
Lo mqeqeshi waseSerbia, ofike eNingizimu Afrika ezocija iTS Galaxy, usize leli qembu ukuthi lifinyelele kuma-quarterfinal kwiCAF Confederation Cup.
IBelouizdad inqobe imidlalo emihlanu kweyisithupha eyidlalile yamaqoqo, yaqeda iphezulu eqoqweni layo.
Kule midlalo kubalwa naleyo eshaye kuyona iStellenbosch FC kabili, egcine iphumule kulo mqhudelwano.
Abalandeli beChiefs balindile ukuthi iqembu labo limemezele umqeqeshi omusha uma sekuphele isizini ka-2025/2026.
Bavele bezwakala sebenele abaqeqeshi ababili ababambile kuze kuphele isizini, uCedric Kwaze noYoussef Ben Khalil.
Nokho uRamovic, ohlale ethuthana noRulani Mokwena, oqeqesha iMC Alger yase-Algeria, unezinkinga eqenjini lakhe.
Lo mqeqeshi kuvela ukuthi uvele ekomitini leqembu eliqondisa ubugwegwe, kulandela ukuhilizisana nabalandeli izikhawu ezimbalwa.
Isigameko sokuqala senzeka emdlalweni weligi iqembu lakhe libhekene neJS Kabylie ngoJanuwari, lapho uRamovic axabana nabalandeli ababediniwe ngemuva kokuthi beshaywe ngo 1-0.
Esesibili senzeke ekuqaleni kukaFebhuwari ngemuva kokunqoba ekuhambeni kweCR Belouizdad, ibhekene neSingida Black Stars, eTanzania, koweConfederation Cup.
Kubikwa ukuthi uRamovic waxabana nabalandeli ababehambile, okwaholela ekutheni kube khona abangena enkundleni ‘ukuyoxoxa naye.’
Kwalamula onogada nabanye abasebenzi beqembu ukuze kudambe isimo, okuyikona osekufake uRamovic enkingeni.
IBelouizdad ikhiphe isitatimende kwiFacebook iqinisekisa ukuthi uRamovic uvele phambi kwekomiti eliqondisa ubugwegwe.
“Ngokulandela imigomo yangaphakathi yeqembu, nokubheka lokhu okuqoshiwe okwenzeka sibhekene neSingida eTanzania kwiCAF Confederation Cup, kanjalo nomdlalo weligi sibhekene neJS Kabylie, umqeqeshi uSead Ramovic uvele phambi kwekomiti eliqondisa ubugwegwe leqembu, ukuzocacisa ngokwenzeka,” kusho isitatimende.
Uma uRamovic egcina eqashwe yiChiefs kuzohlaluka ukuthi uKhanyisa Mayo uyahlala yini kuleli qembu laseNaturena, abolekiswe yiCR Belouizdad kulona.
URamovic uyena okuvele ukuthi uthe ngeke amsebenzise uMayo kule sizini, wase ebolekiswa kuMakhosi.
IChiefs izobhekana neStellenbosch FC emdlalweni weBetway Premiership, eFNB Stadium, ngoLwesibili ngo-7.30 ebusuku.
Amakhosi azothola ithuba lokuziphindiselela kwiStellies ewakhiphe kwiLast 32 yeNedbank Cup emasontweni edlule.
