UNdamane ufuna babuyise ukuzethemba ngokushaya Usuthu koweligi
SIHLE NGUBO
Ngemuva kokukhishwa yiTS Galaxy kwiNedbank Cup ngempelasonto, iMamelodi Sundowns ibabele eThekwini ukuyodlala umdlalo obalulekile weBetway Premiership, esingena egiyeni lokushuba.
Abafana BaS’tyle bathelwe othulini yiRockets ngo 2-0 emdlalweni weLast 16 yeNedbank Cup, bawasha ijezi kulo mqhudelwano ohlonishwayo eNingizimu Afrika.
ISundowns kumele ivuke izithathe uma seyitholana phezulu naMaZulu FC emdlalweni weligi, eMoses Mabhida Stadium, eThekwini, ngoLwesibili ngo-7.30 ebusuku.
Leli qembu laseChloorkop ligcine lishaye i-Orlando Pirates ngo 2-1 emdlalweni wePremiership obubhekwe ngabomvu, eFNB Stadium, ngeledlule.
Njengamanje iDowns isele ngamaphuzu amathathu kuphela kwiPirates ezihola phambili kwilogi yePremiership.
Ukushaya Usuthu kungayibuyisela esicongweni iDowns ngenxa yomehluko wamamagoli kodwa la maqembu azobe eselingana ngakho konke okunye.
Ngasohlangothini loSuthu lungazithola lunyukela endaweni yesithathu uma lunqoba, bese kuncika ekutheni iKaizer Chiefs ayinqobi uma isibhekene neStellenbosch FC, ngalo oLwesibili.
UKhulumani Ndamane, odlala emuva kwiDowns, uthe lo mdlalo kumele bawunqobe ukuze babuyise ukuzethemba.
“Amajita abengemnandi (ngemuva komdlalo weTS Galaxy) kodwa njengoba sekwenzekile kumele sigxile kulo mdlalo wangoLwesibili,” kusho uNdamane obegijima kwiRockets.
Lo mdlali weBafana Bafana ujoyine ompetha beligi njengoba bekuvulwe iwindi lokuhwebelana ngabadlali ngoJanuwari.
“Umqeqeshi usitshele ukuthi sikhohlwe yinto eyenzekile sigxile emdlalweni wangoLwesibili. Yilokho esikwenzayo.
“Kuzoba umdlalo ongelula ngoba AmaZulu enza kahle kakhulu kule midlalo edlule.
“Okwethu ukuthi sigxile emdlalweni, sidlale ngendlela umqeqeshi asitshele ngayo.”
Lo mdlali uthe akekho umdlali woSuthu angambalula ukuthi kumele bamqaphele kodwa kumele bangalithathi kancane lonke iqembu.
AmaZulu adlulele kuma-quarterfinal kwiNedbank Cup kulandela ukushaya omkhaya iRichards Bay ngo 1-0 ngoLwesihlanu.
Emidlalweni yeBetway Premiership Usuthu lugcine lushaywe yiPirates ngo 2-0 khona eMoses Mabhida Stadium.
