Iminjunju kwaboSuthu neBucs kushona abalandeli abaqavile
SIHLE NGUBO
Sekuphinde kwagubazela ifu elimnyama kunobhutshuzwayo, kulandela ukudlula emhlabeni kobengumlandeli oqavile waMaZulu FC, uLuyanda Mbuyazi, obedume ngelika-Usuthu Queen.
UMbuyazi ubegqame kakhulu kuSuthu, futhi ubengasali emidlalweni yalo, yasekhaya neyasekuhambeni.
Ukudlula kwakhe emhlabeni kuqinisekiswe AmaZulu FC, ngesitatimende asithumele abezindaba.
“Ibhodi yaMaZulu, abaphathi, yithimba, abadlali, abalandeli nomndeni wonke kunobhutshuzwayo, bashaqekile ngokudlula emhlabeni kukaLuyanda Mbuyazi, obaziwa ngelika-Usuthu Queen,” kusho isitatimende soSuthu.
“Njengomlandeli obenogqozi futhi ezinikele waMaZulu FC, uMbuyazi uqale ukunakwa ngenxa yokwethembeka kwakhe nokuba yingxenye yabalandeli boSuthu.
“Uthando lwakhe lweqembu belungaphezulu kwezinsuku zemidlalo. Ubemele umoya wabalandeli, enomfutho, ukuzigqaja futhi exhumene nosiko loSuthu.
“Ngenxa yalokhu kuzinikela kwakhe nokuzimbandakanya ezintweni ezithinta abalandeli, usize iqembu ukuthi liqinise izwi nokubonakala kwabalandeli baMaZulu.
“Ukudlula kwakhe emhlabeni kushiya isikhala esikhulu kulabo abathanda Usuthu. Uzokhunjulwa, hhayi ngokomdlandla wakhe kuphela ebholeni, kodwa nokuzigqaja abekukhombisa ehlobe ngemibala yeqembu kanjalo nosiko lwaMaZulu Football Club.
“Umoya wakhe uphumule ngokuthola. Hebe Usuthu!”
Kwenzeka lokhu nje abalandeli bebhola bebesamangazwe izindaba zokudlula emhlabeni komlandeli omkhulu we-Orlando Pirates, uCharles “Makhalanjalo” Fantisi.
Akungabazeki ukuthi lokhu kubakhubaze kakhulu abalandeli banobhutshuzwayo eNingizimu Afrika, ngoba uMbuyazi noFantisi bebenza kube mnandi kakhulu ukubuka ibhola uma besenkundleni.
