I-Pirates isethubeni lokuhlala phezu kweDowns, iyishaye ngengqotho
SIHLE NGUBO
I-Orlando Pirates isethubeni lokugibela phezu kweMamelodi Sundowns, iyiqongqothe ikhanda ithi ‘ngqotho mfana, hamba uyongigolela amadiye ngemuva kwendlu kini.’
EZimnyama ngenkani zinethuba lokwenza lokhu uma sezitholana phezulu neRichards Bay FC emidlalweni weBetway Premiership, eMhlathuze Sports Complex, ngoLwesihlanu ngo-7.30 ebusuku.
Kuyiwa kulo mdlalo nje iPirates isendaweni yesibili kwilogi yeBetway Premiership ngamaphuzu angu-54.
Ilandela abavikeli besicoco iSundowns, abanamaphuzu angu-56 – womabili amaqembu asedlale imidlalo engu-23.
ISundowns ngeke iyidlale imidlalo yeBetway Premiership kule mpelasonto njengoba izotholana phezulu ne-Esperance yaseTunisia, emlenzeni wokuqala kowandulela owamanqamu weCAF Champions League.
Lokhu kuchaza ukuthi uma iBucs inqoba kwiNatal Rich Boyz ngoLwesihlanu, izohlala esicongweni isikhathi esingaphezulu kwesonto.
I-Pirates izophinde idlale umdlalo weligi naMaZulu FC e-Orlando Amstel Arena, ngo-Ephreli 18, iSundowns isatikatikana ne-Esperance emlenzeni wesibili womdlalo owandulela owamanqamu weChampions League.
Umdlalo olandelayo weligi ozodlalwa Abafana Ba’Style, ungo-Ephreli 22 lapho izokwamukela iStellenbosch FC, eLoftus Stadium, ePitoli.
Uma iPirates iyinqoba imidlalo emibili ezoyidlala neRichards Bay noSuthu, nakanjani lokhi kuzoyicindeza iSundowns uma isibuyela ekhaya izodlala eyeligi.
IBucs ivutha kakhulu kulezi zinsuku njengoba igcine ngokubhaxabula iLamontville Golden Arrows ngo 5-0 ngoLwesithathu.
Umdlali obukeka elikhuphulile kakhulu izinga kweZimnyama, uRelebohile Mofokeng, osehlohle amagoli amahlanu emidlalweni emibili edlule.
Ushaye amathathu bebhekene neTS Galaxy, wase engeza ngamabili begugisa i-Arrows ngesibhaxu (njengenjwayelo) ngoLwesithathu.
Akahambi yedwa uMofokeng njengoba no-Oswin Appollis ephithezela kutatazele izitobha emaqenjini abasuke bedlala nawo.
Naye u-Appollis ushaye amagoli amabili ngesikhathi bedla iRockets phakathi nesonto.
