Ibuyile iZululand Ultra Marathon ezogijinywa ngeSonto
NTOBEKO MZIMELA
Iningi labesubathi abavela ezinkalweni zonke zaseNingizimi Afrika, nalabo abavela kwamanye amazwe lizothola ithuba lokulungiselela iComrades Marathon ngeSonto
Lokhu kuzokwenzeka njengoba isifunda iZululand sizosingatha umjaho iZululand District Ultra Marathon yalo nyaka nekhuza ibuya njengoba yagcina ukugijinywa ngo-2019.
Lo mjaho, owaqala ngo-2005, ugijinywa kulesi sifunda esinothile ngokomlando wesizwe samaZulu. Uzosukela Ondini (Ulundi Airport) uphelele kwaNongoma, eKing Bhekuzulu High School ngeSonto, kusukela ngehora lesithupha ekuseni.
Kulindeleke abasubathi ababalelwa ku-5000 ngokusho kukaCeli Makhoba, ongumqondisi walo mjaho. Uzwakalise ukujabula okukhulu ngokubuya kwawo usushaya ngemiklomelo econsisa amathe, njengoba ozonqoba umjaho omkhulu (56km) ezohlomula ngo-R100 000 owesilisa nowesifazane.
Okunye okuqaphelekayo kulo nyaka ukuba khona kwamanye amabanga okungu-10km ozobe uzungeza idolobha uNongoma. Ozonqoba leli banga uzohlabana no-R5000 kwabesilisa nabesifazane, kanti ukhona no-5km ozoqala uphinde uphelele khona eKing Bhekuzulu High School.
ULoveness Madziva noNkosinathi Mhlakwana abawunqoba ngo-2019 lo mjaho, bazobe bengekho kulokhu ngenxa yezizathu ezahlukene.
Ukungenela lo mjaho ngohlelo lwe-online sekuvaliwe, kanti kuzovulelwa labo abazozifikela mathupha Olundi Airport ngoMgqibelo (mhlaka 18), kusukela ngo-10 ekuseni kuya ku -9 ebusuku. Kuzophinde kulandwe izinamba ngalo lolu suku.
Umgijimi wamanga amade, odabuka eBulwer, uThobani Chagwe, uzobe eyingxenye yalo mjaho.
