Uzoshuba owomavik’izembe iSwallows neMaritzburg United

Iqembu elizohlulwa uma sekutholene phezulu iSwallows FC neMaritzburg United ngoLwesine lizoziqansisela indlela yayo ebuyela kwiDStv Premiership.

Womabili lamaqembu aphanda odakeni le emsileni wologi, futhi izembe seliyalenga kuwo.

ISwallows isendaweni ka-14 ngamaphuzu angu-28 ngemuva kwemidlalo engu-26. Ingaphezulu kweChippa ngenxa yamagoli amaningi.

IMaritzburg yona isemsileni njengoba isenamaphuzu angu-26 ngemuva kwemidlalo efanayo.

ISwallows neMaritzburg sekuyinjwayelo – noma sithi yisiko – kubo ukuvika izembe ngalesi sikhathi sesizini.

Ungafaka neChippa United kulelo thimba lamaqembu aphilisa kanzima abalandeli bawo ngasekupheleni kwesizini.

IChippa idlala neKaizer Chiefs ekhaya eNelson Mandela Bay Stadium ngawo uLwesine ntambama.

ISwallows neMaritzburg bazodlala eDobsonville Stadium, eSoweto ngoLwesine ngo-5.30 ntambama.

Uma iMaritzburg iguqa kulo mdlalo, izosalela emuva kakhulu emaqenjini ebhajwe nawo odakeni lwezembe.

Nokho lokho kuzncika nasekutheni iChippa yona imisa kanjani emdlalweni way neChiefs.

Uma yehluliwe, iMaritzburg iyogiya ngoba kuyobe kusho ukuthi ngeke iqhele kakhulu kuyo futhi bengayeqa uma nbehlula iSwallows.

Uma kuhlulwe iSwallows, ingazithola sekuyiyo esemsileni uma kuwukuthi neChippa iyawina noma idlala ngokulingana.

Namanye amaqembu angenhla kwalawa kwilogi engazithola sekuyiwo abambe umsila ekupheleni kosuku lwangoLwesine.