ICR Belouizdad iphenduke ompushana iSundowns ibukisa ngayo
By Sbongs Gumbi
IMamelodi Sundowns iyiphendule ompushana iCR Belouizdad yase-Algeria iyiwashisa ijezi kwiCaf Champions League.
Amasandawana asezibekisele indawo esigabeni semidlalo eyandulela owamanqamu ngemuva kokushaya iCR Belouizdad ngo 2-1 ngoMgqibelo ntambama.
Kube ngu 6-2 uma sekuhlanganiswe imiphumela yemilenze yomibili yalo mdlalo.
Leli qembu likaRulani Mokwena beliye kulo mdlalo livele lisebuhleni njengoba belihamba phambili ngo 4-1.
Lalishaye iCR Belouizdad ngo 4-1 ekuhambeni ngempelasonto edlule kanti eLoftus bese liqedela ingcuba yalo nje.
Okokuqala ke kusukela ngo-2019 iSundowns ifika kulesi sigaba salo mqhuedelwano kanti sekuzomele izibambe ziqine.
ISundowns izobhekana neWydad Athletic yaseMorocco esigabeni esilandelayo.
IWydad ke yona iyiqembu elihleleke kangcono kuneCR Belouizdad futhi ivele seyike yayithwalisa uthayela emoyeni iSundowns phambilini.
Umdlalo uqale kungathi lezi zivakashi kukhona isimanga ezingasenza njengoba bezicindezela.
Kube yiyo iCR Belouizdad elithola kuqala igoli ngesikhathi uS Bouchar elibeka enethini ngomuzuzu ka-24.
Izamile ukuthola elesibili ebelizoyifaka ingcindezi iSundowns kodwa kwasho ukuthi seyuvukile, yabona ukuthi akudlalwa la.
UThemba Zwane ubuyisele iSundowns emdlalweni ngomzuzu ka-45, eqedela umsebenzi omuhle wezakhe.
Esiwombeni sesibili kula iSundowns beyisivule khona isikole, kungathi izidlalela yodwa ejimini la isuke iphucula khona amacebo ayo.
UThapelo Morena ushaye elilula igoli ukuqeda umsebenzi kusaphele imizuzu emine kubuywe ekhefini.
FUNDA NALA: U-Itumeleng Khune ukhuza ibuya ezintini kwiKaizer Chiefs
Indlela edlala ngokukhululeka nangokuzethemba ngayo iSundowns yenza abalandeli bayo baqale baphuphe ngenkanyezi yesibili ejezini leqembu.
Futhi ke akulula ukubasola ngalokho ngoba uma ingaqhubeka nalo mgqigqo wayo, akukho okungayivimba ukudla lesi sicoco.
