Ugcine elitholile iqembu uThabo Rakhale obesewujikanelanga
By Alfred Ngubane
UThabo Rakhale uke wakhala emavikini ambalwa ngokuthi usephenduke ujika nelanga futhi usengenwa wumkhwantalala ngenxa yokuswela umsebenzi.
Lo mdlali owazakhela igama kwi-Orlando Pirates ubehleli ekhaya isizini yonke le edlule kulandela ukuthi adilizwa kwiMarumo Gallants.
Impempe yabika ngaye ngesikhathi eveza usizi lokuhlala ekhaya ethi akusemnandi ngoba nabantu bayambuza ukuthi kungani engasadlali.
“Kuyagqilazana emqondweni ukungadlali isikhathi eside kanjena,” washo kanjena uThabo Rakhale ezikhalela ngomsebenzi.
“Uyazi uma sewujwayele ukuvuka njalo ekuseni uye emsebenzini, bese kuvela kuphela lowo msebenzi esithubeni kuba nomthelela omubi emqondweni.”
Nokho sesingakuveza ukuthi uThabo Rakhale usebuyele ekudlaleni yize engezukuba sezingeni elikhokhelayo okwamanje.
“Usethole kwiJomo Cosmos futhi uyazi ke nawe uJomo (Sono, umphathi weCosmos) uyazithandela abadlali abafana naye.
“Uyafuna ukusuka kwi-ABC (Motsepe League) abuyele esigabeni esikhokhelayo manje uyaqinisa eqenjini futhi yingakho eselande noThabo Rakhale nje,” kusho umthombo.
FUNDA NALA: USandile Zungu uvuma eyobuhlongandlebe kuMaZulu
EzeNkosi, okuyisidlaliso seCosmos, zidlala kwi-ABC Motsepe League yaseGauteng kanti zisale kancane kwiDondol Stars egcine iwine le ligi.
Kuvela ukuthi akuyena ke owokugcina uRakhale ozosayinwa yiCosmos njengoba uSono efuna ukuqinisa nangabanye abanamava.
Kuvela ukuthi imali ayiyona inkinga futhi abadlali bakhe bahola kahle noma iqembu selidlala kulesi sigaba elikuso nje.
