Lishwebile iTheku kulokhu, uya ePitoli owamanqamu kwiNedbank Cup
IPremier Soccer League iqede ukuqagela ngokuthi uzodlalelwaphi umdlalo wamanqamu kwiNedbank Cup ngesikhathi imemezela inkundla ngoLwesibili.
Lo mdlalo bewubhekwe emadolobheni amaningi okukhona kuwo neTheku eselidume ngokuthola imidlalo yalolu hlobo.
Nokho iPSL ithi kulokhu lo mdlalo uya eLoftus Versveld ePitoli futhi uzoba ngoMeyi 27.
Amaqembu azogadulisana kulo mdlalo awakacaci njengoba eyandulela owamanqamu izodlalwa kule mpelasonto.
Kodwa nakanjali eyodwa phakathi kwezinkunzi zaseSoweto i-Orlando Pirates neKaizer Chiefs iyobe ikhona.
Iyobe igadulisana noyedwa phakathi kweStellenbosch FC neSekhukhune United nabo abazodlala kweyandulela owamanqamu kule mpelasonto.
IChiefs nePirates bazokhiphana inkani eFNB Stadium ngoMgqibelo ngo-3 ntambama.
IStellies neSekhukhune bona bazobe beseDanie Craven ngeSonto ngo-5.30 ntambama.
Amaqembu azonqoba kulo mdlalo yiwo ayobe eseyoqeda indaba kowamanqamu kwiNedbank Cup ePitoli.
Isikhulu esiphezulu kwiPSL esibambile, uMato Madlala sithe le nkundla yasePitoli iqokwe ngenxa yomlando wayo.
“ILoftus Versfeld Stadium inomlando onothile kwezemidlalo kuleli,” usho kanje uMato Madlala.
“Sijabule kakhulu ukuthi owamanqamu kwiNedbank Cup kulokhu ube kule nkundla. “LO mqhudelwano ube nesasasa elikhulu kulokhu futhi nobekwenzeka enkundleni bekuseqophelweni eliphezulu.
“Sibheke ukuthi kuqhubeke kanjalo kuze kube sekupheleni kwalo mqhudelwano,” kuchaza yena.
Imininingwane ngalo mdlalo kuzobuye kumenyezelwe ngokunjalo nokuthi amathikithi azoqala nini futhi kuphi ukudayisa.
FUNDA NALA: Akumethusi uHappy Jele ukuyobhekana nePirates okokuqala
Impempe isanda kubika ukuthi inkundla yaseThekwini, iMoses Mabhida Stadium obekubhekwe ukuthi inikwe lomdlalo wamanqamu kwiNedbank Cup ayisekho esimweni esihle.
Isiqalile ukududa yize isaneminyaka engaphezu kancane kweshumi yakhiwa futhi kungenzeka imicimbi emikhulu igcine ingasayanga khona.
By Sbongs Gumbi
