UKennedy Mweene uveza imfihlo ngeminyaka yakhe
By Alfred Ngubane
Unozinti weMamelodi Sundowns uKennedy Mweene uthi naye wake watshelwa ukuthi akayokwehlisa iminyaka esengumfanyana.
Uveze lezi zindaba ekhuluma ohlelweni lweSuperSport TV iSoccer Africa kuleli viki la bebedingida khona eyokwehliswa kweminyaka ebholeni lase-Afrika.
Lesi sihloko besiqhamuke ngemuva kokuthi iCaf ihoxise iSouth Sudan kwi-Under 17 Africa Cup of Nations eqhubekayo e-Algeria.
Kuzokhumbuleka ukuthi unozinti wakuleliya lizwe okuthiwa usemncane waphenduka ihlaya emhlabeni jikelele njengoba ebukeka emdala.
Nokho uKennedy Mweene uthi yinto ekhona cishe kuwo wonke amazwe e-Afrika ukwehliswa kweminyaka yabadlali.
“Nami ngake ngatshelwa ukuthi angehlise iminyaka, kodwa ngenqaba,” kusho lo nozinti oneminyaka engu-38.
“Ngatshelwa lokho futhi mhalwumbe yingakho ngadlala kanye nje vo eqenjini labafana abaneminyaka engaphansi kuka-21 eZambia ngesikhathi lize lapha eNingizimu Afrika.
“Abantu babengitshela ukuthi, ‘hhayi kumele uyehlise kancane iminyaka yakho’. Mina nganqaba ngathi angisobe ngakwenza lokho,” kuchaza uKennedy Mweene.
“Ngaqale ngaqokelwa eqenjini elaliyodlala imqhudelwano weCoca-Cola eZimbabwe. Kwathi uma sibuya, ngaqokelwa kwele-Under 20 elalizodlala kwiCosafa eNingizimu Afrika.
“Kodwa kwathi ngingakayi ekhempini, kwakhona ongiyalela ukuthi angiyokwenza isitifiketi esisha esineminyaka eyehlisiwe.
“Wathi lokhu kuzongisiza ngidlale noma iminyaka emithathu kuleli qembu lika-Under 20. Nganqaba ke mina.”
FUNDA NALA: Kufufusa umbango ngoRanga Chivaviro weMarumo Gallants
Uthe uyazibonga ngesinqumo sakhe ngoba mhlawumbe wayeyogcina ephelele khona eZambia ngebhola lakhe ngoba kwakuzolokhu kuthiwa usemncane.
“Ukube ngakwenza lokhu abebekufuna mhlawumbe ngabe sengaliyeka nebhola ngazama impilo engxenye. Ngabe ngina-34 kumanje,” kusho yena ehleka.
