Khuzwayo: Umkhuba usekhaya ngendlala yezindebe kwiChiefs
By Alfred Ngubane
Owayengunozinti weKaizer Chiefs uBrilliant Khuzwayo uthi umunwe awukhonjwe kubaphathi baleli qembu ngokugqoza kwempumelelo.
Uthi akumele kusolwe abaqeqeshi nabadlali njengoba leli qembu linganqobi lutho ezindebeni kule minyaka eyisishiyagalolunye.
UBrilliant Khuzwayo wadlala kuleli qembu iminyakana ngaphambi kokuya kwi-Orlando Pirates. Nokho khona akahlalanga kakhulu njengoba alimala ngendlela eyamphoqa ukuthi athathe umhlalaphansi ebholeni elikhokhelayo.
Ukhala ngokuthi ngeke kusolwe u-Arthur Zwane njengoba nabaqeqeshi abanamava bafika kodwa izinto azangahamba kahle nakubo.
“Inkinga wukuthi bafika kucinene ngenxa izinkinga zeminyaka ezingahlakuliwe,” kusho uBrilliant Khuzwayo.
“Yizo lezi zinkinga e zabavimba ukunqoba izindebe. UGavin Hunt wafika ngonyaka lapho iChiefs igwetshiwe yiFifa.
“Yayibekela umbandela wokuthi ingabathengi abadlali. Kodwa wahamba ibanga elide kwiCaf Champions League qede bamxosha.
“Ngemuva kwalokho balanda uStuart Baxter… Kukhona no-Ernest Middendorp owalahlekelwa yisicoco seligi ngosuku lokugcina.”
UBrilliant Khuzwayo uthe akaqondi ukuthi kungani laba baqeqeshi benganikwanga isikhathi esanele sokuthi balungise isimo.
Kumanje u-Arthur Zwane uphume elimele enkundleni ngemuva kokujikijelwa ngabalandeli ebebecasukele ukuthi iqembu lihluliwe.
Lokhu kwenzeke eRoyal Bafokeng Sports Palace eRustenburg ngoMgqibelo ntambama ngemuka kokushaywa yiSuperSport United ngo 1-0 emdlalweni weligi.
Akukacaci ke ukuthi iqembu lizomisa kanjani ngaye njengoba abalandeli sebekuvezile ukungeneliseki kwabo ngalo mqeqeshi.
Nokho uBrilliant Khuzwayo ukholwa wukuthi izinkinga eNaturena zingaphezu kwalokhu okubonwa abantu enkundleni.
FUNDA NALA: Uncoma ukuzikhandla kukaPule Mmodi yize engase abashiye
Ubuze ukuthi kungani kunabadlali abehlelwa yifomu kuleli qembu bese behluleka ukubuyela ezingeni abaziwa bekulo.
“Kunabadlali ekade bedlala kahle manje behlelwe izinga ngendlela exakile. Ungasho nje ukuthi kwenzakalani ngoKhama Billiat, Keagan Dolly no-Erick Mathoho?”
