Uqhamuka nesu lokufukula ibhola e-Afrika u-Essien
By Alfred Ngubane
UMichael Essien owazakhela igama kwiChelsea, Real Madrid neqembu lesizwe eGhana unombono ngendlela wonke amaqembu esizwe e-Afrika engaphucuka ngayo.
Usenxuse umengameli weCaf uPatrice Motsepe ukuthi ashaye umthetho ozophoqa amaqembu esizwe ukuthi aqashe abaqeqeshi basekhaya.
“Baningi kakhulu abaqeqeshi abangayenza uma khonya i-Afrika ebholeni lomhlaba,” kusho u-Essien engxoxweni ekhethekile neMpempe.
“Kunabaqeqeshi abafana noPitso Mosimane osekhombise umhlaba wonke ukuthi ungumqeqeshi ovelele nowazi umsebenzi.
“Abahlanganiswe laba baqeqeshi ndawonye ngamakilasi basebenze emazweni abo,” kuchaza u-Essien.
“Nasemaqenjini ezikwata kusukela emazingeni aphansi kuqeqeshe abantu abanolwazi lwebhola.
“Nasezikoleni makuqeqeshe abaqeqeshi abadlalile emazingeni aphezulu ebholeni,” kuchaza le nkakha ikhluma iseFrance la isizinze khona.
U-Essien ubona nalento yokulandwa kwabaqeqeshi baphesheya ifana nokugidagida ndawonye ngoba abaningi basuke beze imali nje kuphela.
“Abaqeqeshi abamhlophe abeza e-Afrika basuke bangenalo ikhono lokuqeqesha iningi labo. Ukube banalo ngabe baqashwa ngakubo.
FUNDA NALA: IPretoria Callies isaqhubeka nokuphenya ngezinsolo zokugwazelwa
“Bafike balibulale ibhola lethu bedlalisa umbozo webhola. Isikhathi sokuqala kabusha ukubumba ibhola lase-Afrika ngokuhlanganyela.
“Ngiyakholelwa ebuholini obukhona bukaPatrice Motsepe ngoba uyindoda eqotho,” kusho u-Essien.
