UJose Riveiro uphawula ngoRatomo, uveza nesifiso ngesicoco seligi
By Sbongs Gumbi
URelebohile Ratomo usuke engenzelwa isihe ngokudlaliswa kwi-Orlando Pirates, ngokusho komqeqeshi uJose Riveiro.
Lo mfanyana osemncane usadlale imidlalo emibili kwiPirates kodwa usephenduke undabuzekwayo ngenxa yekhono elibonakala kuye.
Wadlala okokuqala bebambana neRoyal AM la ibhola ayelikhahlelile lazishayisa kuThabo Matlaba qede layonamathela enethini.
Uphinde waqala umdlalo iPirates ibhaxabula AmaZulu FC ngo 4-0 ngoMgqibelo ntambama eMoses Mabhida Stadium.
URatomo nguye oshaye igoli lesibili kulo mdlalo. Elokuqala lishaywe uThabiso Monyane. UMonnapule Saleng noKabelo Dlamini nabo babhalise awabo amagama kwabashaye amagoli kulo mdlalo.
“Uma uRatomo, oneminyaka engu-17 engena eqenjini eliqala umdlalo ofana nalo wanamuhla, lokho kusho lukhulu ngekhono lakhe,” kusho uJose Riveiro.
“Kodwa usemncane ngakho kumele sibe nesineke ngaye. Kumele sikhethe izikhathi ezifanele esizomdlalisa ngazo.”
Uthe eqenjini lakhe yena ubophela umdlali ngenxa yakubone ekwenza ejimini, akabheki okunye.
“Uma ubona umdlali eqala umdlalo eqenjini lethu ubokwazi ukuthi wenza kahle ejimini, uyazinikela futhi uyayiqonda indlela esifuna ukudlala ngayo.
“Yilezo izizathu ezisenza sifake abadlali eqenjini eliqala imidlalo,” kuchaza lo mqeqeshi osephenduke intandokazi kubalandeli beBucs.
UJose Riveiro uphinde waveza ukuthi bazoyifakela inselelo iMamelodi Sundowns ngesicoco seligi ngesizini ezayo.
“Akuyona into ebesiyifuna le (ukuqeda endaweni yesibili). Besingalweli ukuqeda endaweni yesibili kodwa sehlulekile ukufakela ompetha inselelo kule sizini.
“Okwamanje sizoyamukela le ndawo esikuyo. Kodwa siyabuya ngesizini ezayo. Kumele sifake inselelo , hhayi kwiSundowns nje kuphela.
“Kuningi la kumele senze ngcono khona futhi kumele silwe zisuka. Wonke amaqembu azoqala enganaphuzu ngesizini ezayo futhi uma singalwa zisuka futhi sidlale yonke imincintiswano ngokuzimisela, nginesiqiniseko singenza kangcono.”
FUNDA NALA: ICape Town City iqede ukuqagela ngohalelwa awaseSoweto
Ukhuluma kanje nje uRiveiro kungenzeka aqede le sizini kunguye umqeqeshi obe nempumelelo ukubedlula bonke kwiPSL uma enganqoba iNedbank Cup.
IPirates izogadulisana neSekhukhune United kowamanqamu kule ndebe ngoMgqibelo eLoftus Versfeld.
Ivele ke isinayo indebe njengoba kuyiyo enqobe iMTN8 ngasekuqaleni kwesizini.
