Usophe ukuqopha umlando kwiComrades uGalatetsang Mekgoe

UGalaletsang Mekgoe waba ngumsubathi wokuqala omnyama wesifazane ukuqeda endaweni yesihlanu emlandweni weComrades Marathon.

Manje usesophe ukuqeda ukuchanasa kwezintokazi ezimhlophe, ikakhulukazi ezaseRussia, njengoba zakhonya kusukela ngo-1921 kuze kube manje.

AUbengakabi khona umgijimi omnyama onqoba lo mjaho noma ongene endaweni yesibili ohlangothini lwabesifazane.

“Ngisebenze kanzima ukulungiselela le Comrades Marathon. Bengisizwa ngozakwethu besilisa esinabo eqenjini leNedbank Running Club eNorth West.

“Kubo bekukhona u-Edward Mothibi, Daniel Matshailwe, Dijana Tete, Onalenna Khonkhobe,” kusho uGalatetsang Mekgoe.

“Umqeqeshi wethu uDave Adams ungitshelile ukuthi kumele ngilwele isithunzi sabantu besimame abamnyama.

“Uthe ngiyisosha lokugcina manje. Wathi kumele ngiyinqobe le Comrades Marathon ngaphandle kwamathandabuzo.

“Ngizothembela kuyena umqeqeshi wethu uDave Adams nomenenja wethu uNick Bester ukuthi bangisize.

“Ngiyakholwa ukuthi uNick Bester uyakholelwa kumina njengoba ungidonse ngendlebe ukuthi ngizinikele ngayoyonke indlela.

“Uthe njengoba sengiwazi umzila weComrades Marathon kuzongisiza kakhulu lokho,” kuqhuba uGalatetsang Mekgoe.

UGalatetsang Mekgoe uthi bakhona nabanye abasubathi besifazane abamfiselayo futhi abamgqugquzelayo ukuthi aqophe lo mlando.

“Bakhona abasubathi besimame abamnyama abangesekayo ukuthi nginqobe lomjaho omkhulu nohlonishwayo emhlabeni jikelele.”