Ithemba lokuqeda ishobolo leKZN Umsinga United ushaya imfivilithi
By Alfred Ngubane
Umsinga United uwuqale kahle umkhankaso wokuzama ukwenyukela kwiMotsepe Foundation Championship ishaya iDondol Stars ebhekwe ekunqobeni eyokuhlunga.
Le midlalo yokuhlunga ibanjelwe eMgungundlovu kanti leli qembu laseMabomvini eMsinga Top linqobe umdlalo wokuqala ngo 2-1. Womabili amagoli ashaywe uThobani Mthembu.
IDondol Stars, emele iGauteng kulo mqhudelwano, yiyo ebhekiwe kulo mqhudelwano okuzophuma kuyo amaqembu azonyukeka kwiChampionship ngesizini ezayo.
Leli qembu lizakhele igama ngokudlala kahle kwiNedbank Cup la lawashisa khona iSuperSport United naMaZulu Fc ijezi.
Laze labanjwa yi-Orlando Pirates esigabeni sama-quarter final, nakhona sekukhahlelwa amaphenathi.
Yingakho ke liyimfivilithi kule midlalo yokuhlunga ebanjelwe eMgumgundlovu ezinkundleni zezemidlalo iHarry Gwala Stadium neWoodburn Stadium .
Abafana baka Welcome Mpanza noDoctor Mkhonza, ongumqeqeshi bangene enkundleni bashaya kuqala igoli ngesiwombe sokuqala.
Ibuyile iDondol Stars yalinganisa esiwombeni sesibili kodwa waphinde wabuya Umsinga United negoli lokunqoba.
Ubuyise ithemba lokuthi iKwaZulu-Natal nayo izoke ibe neqembu elinqobayo kule midlalo bese linyuselwa ezigabeni zebhola elikhokhelayo.
Selokhu kwagcina ukwenzeka ngoThongathi FC neReal Kings ukwenzeka lokhu esifundazweni.
Umvoti United, ongomakhelwane nezimbangi ezinkulu zoMsinga United, usuhluleke amahlandla amabili kule midlalo yokuhlunga.
Sekubhekwe ukuthi Umsinga United uqede leli shobolo. Emdlalweni olandelayo uzobhekana neBuffalo FC yaseFree State ngoLwesithathu ngo-12 emini eWoodburn Stadium.
FUNDA NALA: Ulahlwe yicala lokushaya intombi uThembinkosi Lorch wePirates
Amaqembu amabili azoqeda phezulu kumaqoqo wawo yiwo azobe esedlule esigabeni semidlalo eyandulela owamanqamu. Ayonqoba lapho yiwo azongena kwiChampionship.
