Iyaqina eyeKaizer Chiefs nomqeqeshi waseTunisia
Njabulo Shezi
Kubukeka lizogcina ligcwale umoya ibhantshi ku-Arthur Zwane njengoba iqina imibiko yokuthi iKaizer Chiefs ishela umqeqeshi waseTunisia.
Le mibiko iqale ukuvela ngeviki elidlule. Kuthiwa iKaizer Chiefs izimisele ngalo mqeqeshi, uNasreddine Nabi odabuka eTunisia kodwa oqeqesha eTanzania njengamanje.
Ngokubika kwabeSABC Sport, izingxoxo sezisezingeni eliphezulu futhi sekusele kuvunyelwane ngemihlomulo yalo mqeqeshi kuphela.
UNabi njengamanje uqeqesha iYoung Africans yaseTanzania kanti wenza umsebenzi omuhle njengoba ize yafika kowamanqamu kwiCaf Confederation Cup kulo nyaka.
Manje kuvela ukuthi usehehe iKaizer Chiefs efuna umqeqeshi onamava nozokwazi ukushesha ekuvuseni leli qembu.
Kuyamangaza ke ukuthi leli qembu selifuna ukumchintha uZwane yize bekuseyisizini yakhe yokuqala le ephelile.
Nokho ivele iphele abaphathi sebehlukene phakathi ngokweseka kwabo lo mqeqeshi njengoba abanye befuna atholelwe umuntu ozomqinisa ukhakhayi.
Akucacike njengamanje ukuthi uma kugcina ngokuthi iyamthola uNabi kuzokwenzakalani ngoZwane.
Nokuthi iKaizer Chiefs imgeje ke uNabi kungenzeka kwazise kuthiwa ushelwa naseSaudi Arabia, Algeria nangakubo eTunisia.
Kodwa ke ngokwalo mbiko iChiefs seyisheshe yakubeka etafuleni okwayo kanti sekusele kuye lo mqeqeshi ukuthi uyakuthatha yini noma uqhubekela kwezinye izesheli.
Uma egcina kuleli qembu laseSoweto, uzowufica umlindile umsebenzi onzima ngoba uzothwala ingcindezi yokuthi sekuphele iminyakanyaka leli qembu lingawini lutho.
FUNDA NALA: UWelcome Mpanza woMsinga United ucacisa ngokudubula kwaseHarry Gwala
Kuzomele akwazi ukuthi abalandeli ngeke bamnike ithuba lokwakha iqembu ngendlela afuna ngayo njengoba behlezi bejahe ukubona imiphumela esheshayo.
Uma evuma ukuzoqeqesha kuleli – okuzobe kungokokuqala kuye – uzoba ngumqeqeshi wesithupha kuleli qembu eminyakeni eyisishiyagalolunye.
