IMaritzburg isiwumkhoma, iSekhukhune izixebulele unozinti
Sihle Ngubo
ISekhukhune United nayo seyingenele ekuxebuleni umkhoma kwiMaritzburg United esanda kudliwa yizembe kwiDStv Premiership.
IBabina Noko ihlabane ngonozinti uRenaldo Learner obevimbela iTeam of Choice ngesizini edlule.
Lo nozinti oneminyaka engu-25 usayine inkontileka yeminyaka emithathu neSekhukhune.
“Ngikubheke ngabomvu ukudlala kwiDStv Premiership neBabino Noko ngesizini ezayo,” kusho uLearner ongowokuzalwa eKapa.
“Ngizosebenza ngokuzikhandla ukuze ngifake isandla empumelelweni yeqembu, ngibe ngiqinisekisa ukuthi linegama elihle.”
Iqinisa iqembu nje iSekhukhune yingoba izodlala nasemidlalweni yeCaf ngesizini ezayo. Izomela iNingizimu Afrika kwiConfederation Cup.
Lokhu kwenzeke ngokuthi iSekhukhune idlale kowamanqamu kwiNedbank Cup la ihlulwe khona yi-Orlando Pirates.
IPirates yona ibisivele ingenile kwiCaf Chmapions League, ngakho indawo yayo kwiConfed Cup yawela kwiSekhukhune.
ULeaner ufike kwiMaritzburg ngo-Agasti 2021 evela kwi-Ajax Cape Town. Ukhulele kwinkulisa ye-Urban Warriors kwathi ngo-2019 wanyuselwa eqenjini elikhulu.
KwiTeam of Choice udlale imidlalo engu-16 ngesizini ka-2022/23 kwathi kweyisithupha wangangenelwa yigoli.
Kulindeleke ukuthi abadlali abaningi beMaritzburg bayishiye kulandela ukudliwa yizembe.
Kuvele kuthe ingagawulwa yizembe avela amagama abadlali abebeshelwa amaqembu eDStv Premiership abafana noCross noRowan Human.
Okuzokwenza bafuduke kakhulu kwiTeam of Choice yisitatimende sikasihlalo uFarook Kadodia ogxeke abadlali nomqeqeshi ngemuva kokudliwa yizembe.
FUNDA NALA: Kumele abhukule amaqembu aKwaZulu-Natal, aphoxile kulokhu
UFadlu Davids obeqeqesha uvele usexoshiwe nalo lonke ithimba lakhe. Akuyena ke owokugcina uLeaner kubadlali okulindeleke bathathwe ngamanye amaqembu.
Kuvele kuthiwa u-Amadou Soukouma wasayina inkontileka yesethembiso naMaZulu FC kanti nePirates ifuna uKarim Kimvuidi.
