Usevumbuke kwiChippa United uCraig Martin ochithwe yiPirates
Sbongs Gumbi
Ucoshwe yiChippa United uCraig Martin ngemuva kokuchithwa yi-Orlando Pirates esahlale kuyo izinyanga eziyisithupha.
Lo mdlali wasohlangothini lwesikudla – uyadlala emuva nasesiswini – ubefike kwiPirates ngoJanuwari esuka kwiCape Town City.
NgoMsombuluko Impempe ibike ukuthi uubengekho kubadlali bePirates ngesikhathi bebuya ekhefini.
Lokho kwenze kwacaca ukuthi akekho ezinhlelweni zabaqeqeshi zale sizini ezayo njengoba bekuqala amalungiselelo ayo engekho nje.
Sekuthe ngoLwesibili wethulwa yiChippa njengomdlali wayo yize ingakavezi ukuthi imsayine ngokugcwele noma imbolekile yini.
Bekuvele ukuthi iPirates izozama ukubolekisa ngaye kule sizini kwazise ufike wahluleka ukungena esitayeleni sikaJose Riveiro.
Lo mqeqeshi waseSpain akazange akholelwe kuCraig Martin njengoba kuthe noma eselinyalelwe uBandile Shandu noThabiso Monyane wancamela ukushintsha uPaseka Mako esuka kwesokunxele wazodlala kwesokudla.
Umqeqeshi weChippa, uMorgam Mammila ucele amagoli kulo mdlali ngesikhathi ethulwa kuye ejimini yaleli qembu eGqeberha ngoLwesibili.
Akuyena uCraig Martin kuphela imdlali wePirates okulindeleke abolekiswe kwiChippa kule sizini ezayo.
No-Azola Matrose obethengwe kuyo qede wabolekiswa kuyo ngesizini edlule kungenzeka aphinde anikwe yona nakulokhu.
Nomgadli u-Eva Nga naye kuvela ukuthi ufunelwa iqembu azobolekiswa kulo kanti kungenzeka kugcine kube yiyo iChippa.
Kodw ake yena imbanga neSuperSport United okuthiwa nayo sekuvezile ukuthi iyafisa eze kuyo uma iPirates ingensay isikhala sakhe ngesizini ezayo.
NgomSombuluko kuphinde kwavela ukuthi iPirates ayiyicuselelanga inkontileka kaNdumiso Mabena naye obefike kuyo ngoJanuwari.
FUNDA NALA: Kufike ekugcineni kwiBlue Bulls, yamxosha uSbu Nkosi
Kubadlali abasha kwiPirates ababonakale ejimini yayo okokuqala ngoMsombuluko kube nguMelusi Buthelezi noSiphelo Baloni.
UButhelezi ngunozinti othengwe kwiTS Galaxy kanti uBanoli udlala esiswini futhi ubekwi-All Stars ngesizini efile.
