Uzisikela kwelinonile u-Andile Mpisane, ufuna izihlabani zeBucs neDowns

Alfred Ngubane

Usihlalo weRoyal AM, u-Andile Mpisane usethumele umnyalelo kwimenenja yeqembu uRichard Makhoba ukuthi asayine abadlali ababili abona bezosiza leli qembu. 

U-Andile Mpisane ufuna kusayinwe uThembinkosi Lorch we -Orlando Pirates, ophelelwa yinkontileka ngoLwesihlanu, no-Andile Jali ongenalo iqembu njengoba echithwe yiMamelodi Sundowns. 

Laba badlali kuthiwa umfo kaMpisane uyazifela ngabo futhi usetshele unina uShauwn Makhize ukuthi kuxhunywane nezimenenja zalaba badlali. 

ULorch ungomunye wabadlali abangumgogodla kwiPirates noma esehlushwa wukulimala nje, kodwa uma ekhona enkundleni uyabonakala umehluko.

UJali yena ukhonjwa emaqenjini ehlukene kusukela ahlukane neSundowns eyaveza ukuthi ngeke iyivuselele inkontileka yakhe. 

Kuze kube manje belingekho iqembu eliphumele obala ngokuthi liyamfuna. Nokho yena uke wakuveza ukuthi kungenzeka ukuthi ngeke adlale eGauteng ngesizini ezayo. 

Ufake isithombe esiveza ibhodi elithi ‘usuyaphuma eGauteng’ wabe esefaka ama-emoji okuvalelisa. 

Kuthiwa okwenza u-Andile Mpisane afune laba badlali wukuthi akanelisekanga ngendlela iqembu lakhe elenze ngayo ngesizini edlule. 

FUNDA NALA: Selikhathazekile elaseRomania ngoSiya Ngezana ongafiki

 Kuphele isizini iRoyal AM seyibalwa emaqenjini abhekene nenkinga yezembe okuyinto okuthiwa u-Andile uthe akafuni ukuphinde ayizwe. 

Baningi nabanye abadlali abanagamagama namava ebholeni lakuleli okuthiwa uyabafuna futhi uthe uzokwenza konke okusemandleni ukubathola.