Utuse ukubuya kukaSibiya oweGalaxy bebhaxabula iLindelani
BONGINKOSI ZONDI
I-TS Galaxy queens ibuyise isithunzi ishaya iLindelani ladies ngo 6-1 eKing Zwelithini
Stadium ngesonto emini emdlalweni weHollywoodbets Super League.
Lo mphumela ulandela emva kokuba abeGalaxy behlulwe yi-University of Fort Hare emdlalweni odlule.
UNomvula Kgaole, uNicole Michael, uPromise Selena, uMamello Makhabane noBusisiwe Ndimeni yibo abavalele phakathi amagoli eGalaxy.
UNomfundo Xulu uvalele phakathi elokubika leLindelani. Kulo mdlalo ziye ekhefini iGalaxy ihamba phambili ngo 3-0.
UNicole Michael evalele phakathi amagoli amabili kodwa akumqabelanga uMamello Makhabane ukuthi abe ngumdlali ovelele kulo mdlalo.
UMakhabane ubonge ukubuya komqeqeshi uSizwe Sibiya eqenjini kwazise ukholwa ukuthi nguye obazi kancono njengoba ayelibambile leli qembu ngesizini edlule.
“Ngibonga umqeqeshi ngethuba angiphe lona lokubonisa ithalente lami.
“Umdlalo wanamuhla ubungelula kwazise sehlulwa emdlalweni odlule, kanti neqembu
leLindelani lehlulwa…
“Kepha besidinga kakhulu ukuwunqoba lomdlalo wanamuhla. Asiyiqalanga kahle isizini.
“Kepha ukubuya kukamqeqeshi uSibiya kuyintokozo kwazise wayengumqemqeshi wethu ngesizini ephelile.
“Usazi kakhulu yena uyakwazi ukusisebenzisa ngedlela,” kuchaza uMakhabane.
Lo mphumela ubeke iGalaxy endaweni ekahle. Kodwa wandise izinkinga kwiLindelani njengoba seyidlale imidlalo engaphezu kwemine inganqobi.
Emidlalweni emithathu yakamuva sebengenelwe ngamagoli angu-15.
ILindelani Ladies isahleli kunombolo 15 kwilogi kanti inamphuzu amane emdlalweni eyisishiyagalombili.
FUNDA NALA: UNgezana ‘uyinkomo’ edla utshani obungcono kunobaseNaturena
Ngemuva kwayo, emsileni kukhona iThurderbirds engenawo nhlobo amaphuzu ngemuva kokubhaxabulwa yiMamelodi Sundowns ngo 5-1.
