Kuvela okwenze iSundowns imchithe uLesedi Kapinga, ‘inhliziyo iseSoweto’ 

Njabulo Shezi

IMamelodi neSundowns ikhethe ukungawusebenzini umbandlela wokwelula inkontileka kaLesedi Kapinga ekupheleni kukaJuni. 

Ngokusho kwemenja yalo mdlali, iSundowns ivele yabashaya ngomzimba nje kwaze kwadlula isikhathi sokuthi kusetshenziswe lo mbandela. 

“Ngingakuqinisekisa ukuthi iMamelodi Sundowns ayizange iwusebenzise umbandela wayo kwinkontileka kaLesedi Kapinga, okusho ukuthi uzolishiya iqembu,” ucashunwe esho kanje uMudau kwabe-IOL.

“Iqembu belinesikhathi kuze kube uJuni 30 ukuthi lixhumane nami noma nomdlali uqobo ukuze likhulume ukuthi lingathanda yini ukwelula inkontileka. 

“Kodwa alizange lisho lutho futhi uzohamba. Siyayibonga iSundowns ngethuba emnike lona nangendlela ebimnakekele ngayo kukho konke. Asinawo amagqubu njengoba sishiya nje.”

Kodwa isizathu sangempela sokuthi uKapinga angagcinwa sesidaluliwe. Kusolakala ukuthi lo mdlali ubenxenxwa ukuba kushintshiswane ngaye ukuze iSundowns ithole uJunior Mendieta kwiStellenbosch FC.

ULesedi Kapinga ubezobolekiswa kwiStellenbosch. Kodwa wenqaba. Nokho isivumelwano siphumelele futhi uMendieta usejoyine iSundowns ngenkontileka yeminyaka emithathu.

“Ubeyingxenye yesivumelwano sokuthola uJunior Mendieta, kodwa wenqaba ukuya kwiStellenbosch,” kubika iRushsportson.

Umbiko uphinde udalule ukuthi uKapinga usezimisele ngokujoyina iqembu akhula elithanda i-Orlando Pirates.

“Ubeyingxenye yesivumelwano sokutholwa uThapelo Maseko, kodwa wenqaba ukuya kwiSuperSport United. Inhliziyo yakhe ikwi-Orlando Pirates”

FUNDA NALA: Uthukwe yilungu lesigungu seSafa uDoctor Khumalo ngeBanyana

UKapinga wafika kwiSundowns esuka kwiBlack Leopards ngo-2020. Njengamanje lo mdlali akanaqembu kanti engasayina kunoma yiliphi.