Wethembisa ukusiza ekuvuseni iChiefs uGiven Msimango
Sbongs Gumbi
UGiven uMsimango, ongomunye wabadlali abasha beKaizer Chiefs, uvalelise eqenjini lakhe lakudala, iTS Galaxy, wazwakalisa ukuzimisela kwakhe ukusiza Amakhosi ekubuyiseleni izinsuku zawo zenjabulo.
Ubengumunye wabadlali abayisithupha okukhona kubo uRanga Chivaviro, Thatayaone Dithlokwe, Pule Mmodi, Edson Castillo noMduduzi Mdantsane abethulwe ngokusemthethweni yiChiefs ngoMsombuluko.
Ujoyina iChiefs ngenkontileka ende, lo mdlali wasemuva oneminyaka engu-24 uza nethalente elithembisayo nobuholi kuleli qembu laseNaturena.
UGiven Msimango waqokwa waba ngukaputeni kwiHighlands Park esemncane, okuyisikhundla aqhubeka naso ngesikhathi iTS Galaxy ithenga isitifiketi.
Ube esebhala ezinkundleni zokuxhumana ebonga iTS Galaxy nabalandeli bayo, ebavalelisa ebonga impatho ayitholile kuleli qembu.
Uphinde wabheka phambili, ebuka inselelo abhekene nayo kwiChiefs njengoba ezibophezele ukuthi uzonikela ngakho konke anakho ukusiza iqembu liphinde libe ngelisatshwayo.
Phela sekuphele iminyakanyaka iChiefs ingayithi mbibi indebe okuyinto eyihlazo uGiven Msimango afuna balivale.
Uthi kufezeke iphupho njengoba esezogqoka ijezi leChiefs akhule eyithanda, ugcizelele nokulangazelela kwakhe ukuqopha umlando kuleli qembu.
“Ngijabule kakhulu ukumemezela ukuthi sengifikile ngokusemthethweni eqenjini lami lamaphupho,” usho kanje uMsimango ezinkundleni zokuxhumana.
“Ngijabule ngokunikela ngekhono nothando lwami kuleli qembu. Asiqophe umlando ndawonye.”
Ukufika kukaMsimango kungase kuxazululeke izinkinga zasemuba iChiefs ebibhekene nazo ngesizini edlule.
Amaphutha asemuva aqhathe Amakhosi nenduku kungafanele kweminye imidlalo ngesizini edlule.
Kodwa njengoba sekukhona uGiven Msimango noDithlokwe, umqeqeshi omusha uMolefi Ntseki usezoba nabadlali abaningi azoqoka kubo.
Nokho uNtseki kuzomele athole abadlali ababili abasha azovala ngabo emuva maphakathi nenkundla kulandela ukuhamba kukaSiyabonga Ngezana.
UNgezana udayiselwe i-FCSB yeRomania ngenyanga edlule. Umakadebona wasemuva u-Erick Mathoho udedeliwe ekupheleni kwenkontileka yakhe.
Ngaphezu kukaMsimango noDithlokwe, uNtseki uno-Austin Dube, u-Edmilson Dove, uZitha Kwinika no-Aiden McCarthy angakhetha kubo azobadlalisa emuva.
FUNDA NALA: EzaseSoweto seziphinde zaqola iRichards Bay umdlali
UDube nokho kunamahlebezi okuthi uyahamba kuleli qembu kanti uMcCarthy, osemncane, angase abolekiswe ukuze athole isipiliyoni.
