Ube buhlungu uZakhele Lepasa evalelisa kwiSuperSport
Sbongs Gumbi
Kuyacaca uZakhele Lepasa ubesangathanda ukuhlala kwiSuperSport United abebolekiswe kuyo yi-Orlando Pirates ngesizini edlule.
Lo mgadli ufike wanikwa unombolo 10 kwiSuperSport futhi walinikwa nethuba lokudlala, naye walisebenzisa ngendlela efanele.
Indlela adlale kahle ngayo yenze nomqeqeshi weBafana Bafana uHugo Broos athembele kuye emdlalweni wokugcina wokuhlungela iCaf Africa Cup of Nations (Afcon) ngenyanga edlule.
UZakhele Lepasa ushaye igoli lesibili leBafana kulo mdlalo abashaye kuwo iMorocco, qede wajabula ngendlela eyayenziwa uClive Barker esaqeqesha iBafana.
Manje uLepasa usebuyele ekhaya elikhulu kwiPirates la okuthiwa umqeqeshi uJose Riveiro uthe uzomdinga ngesizini ezayo kwazise banemidlalo eminingi.
Yingakho ke uZakhele Lepasa evalelisile kwiSuperSport ngoLwesibili ntambama, ebhala umlayezo wokubonga ngendlela emukelwa ngayo ngesikhathi efika.
“Lolu wusuku ebengingalujahile. Usuku lokuthi ngivalelise ngokusemthethweni kule ndawo ebisifana nekhaya kimi,” kubhala uZakhele Lepasa kwiTwitter.
“Ngichithe isikhathi esiningi nabantu abangemukele kahle, benza kwaba lula kimi ukudlala.
“Ngeke ngilikhohlwe ithuba enginikwe lona lapha. Ngiyabonga kwiiSuperSport United futhi ngiyifisela inhlanhla.”
KwiPirates uLepasa kuzomele alilwele kanzima ijezi njengoba inenqwaba yabagadli. Bangaphezulu kuuka-10 abagadli abasemabhukwini eBucs.
Nokho kulindeleke ukuthi kube khona abachithwayo kant abanye bazozanyelwa kwamanye amaqembu babolekiswe kuwo.
Impempe ibike ngoLwesibili ukuthi leli qembu lingase liphinde lithole nomgadli waseCongo uGuy Mbenza obedlala eSaudi Arabia.
FUNDA NALA: Okwenze iChiefs imshiye uKhama Billiat iya ekhempini
Ngokuthola kwethu, iPirates seyimbekelile okuthile lo mgadli etafuleni kanti sekusele kuye ukuthi uyakwemukela yini.
Kubhekwe ukuthi atheleke kuleli maduze ukuzoqedela izingxoxo bese esayina, ajoyine ozakwabo ekhempini yaseSpain.
