IMoroka Swallows ingase yengeze ngababili abaduma kwiPirates
Njabulo Shezi
iyaqhubeka iMoroka Swallows nomkhankaso wayo wokuhlomela isizini ezayo la izibekele khona umgomo wokuvuka ibe ngelinye lamaqembu alwela izicoco.
Leli qembu selivele lilande uSteve Komphela kwiMamelodi Sundowns ukuthi azoba ngumqeqeshi njengoba lenza izinguquko ezinqala.
IMoroka Swallows iphinde yalanda u-Andile Jali olaxazwe yiSundowns ukuzoqinisa eqenjini kanti manje kuvela ukuthi kukhona abanye ababili exoxa nabo.
Ngokuthola kweMpempe iDube Birds seyimeme uMpho Makola ukuba azozicija nayo ngenhloso yokumbona ukuthi engasayineka yini.
UMakola, owayeyisihlabani esinofakazi kwi-Orlando Pirates, uqale isizini edlule kwiCape Town City kodwa yavele yamlaxaza engazelele maphakathi nayo.
Ube esesayinwa yiPolokwane City ebilwela ukwenyuselwa kwiDStv Premiership isuka kwiMotsepe Foundation Championship.
Kwenzekile ke lokho kodwa kuthe sekumele elulelwe inkontileka uMakola kwamphinda lokho, leli qembu lathi alisamdingi.
Manje kuvela ukuthi usezingxoxweni neMoroka Swallows futhi engase asayine noma nini ukusuka manje.
UMakola uvele uke wasebenza noKomphela phambilini ngesikhathi bebonke kwiFree State Stars okuyila aqala khona ibhola elikhokhelayo.
Omunye umdlali oxoxisana naleli qembu laseSoweto nguThamsanqa Gabuza, naye owazakhela igama kwiPirates.
UGabuza naye akanaqembu ngemuva kokushiya kwiSuperSport United kanti usebheke ukuyogijima kwiSwallows.
“Uzoqala nje ukujima nayo maduze uma engakaqali ngoba izingxoxo ziyaqina impela futhi angase asayine kulo leli viki,” kusho umthombo.
FUNDA NALA: USibisi ufuna iBucs iyivale ngegiya eliphezulu ikhempu yaseSpain
“Uzokhumbula ukuthi ungumngani omkhulu ka-Andile Jali kanti abakufihli ukuthi bengakujabulela ukudlala ndawonye njengoba sebesondela eminyakeni yokuthi balikhumule ijoka.”
