I-Orlando Pirates ibhubhudle iTS Galaxy zizwana amandla eGoli
Njabulo Shezi
Njengoba isizini yeDStv Premiership ka-2023/24 isondela, i-Orlando Pirates iyaqhubeka nefomu enhle emidlalweni yokulungiselela isizini njengoba ishaye iTS Galaxy eSturrock Park, eGoli ngeSonto ntambama.
AmaBhakabhaka akhombise ukukwazi ukumelana nezimo ezehlukene nokuba bukhali uma ehlasela kulo mdlalo obuneziwombe ezintathu.
Womabili lamaqembu abekudinga ukuzihlola ukuthi asehambe kanjani ngamalungiselelo wawo ngokuzwana amandla.
Lo mdlalo wobungani, obudlalwa kungenabalandeli, ubushubile njengoba bewungelula kuwo womabili amaqembu futhi namagoli emaningi.
I-Orlando Pirates ivule inkundla ngegoli likaThabiso Monyane usanda kuqala umdlalo. Nokho, iRockets ikhombise ukuqina futhi yasheshe yalithola elokulinganisa.
Abaqeqeshi benze izinguquko esiwombeni sesibili, benzela ukunika bonke abadlali ithuba lokuba sesimweni esifanele sokulungela ukudlala njengoba isizini entsha seyisondele nje.
Ukaputeni we-Orlando Pirates, u-Innocent Maela udlalise kabi umdlali weGalaxy engaphakathi ebhokisini langakubo, kwabekwa iphenathi.
Umgadli weTS Galaxy, uBernard Parker ube eseyinamathisela enethini. Nokho iBucs ayizange idikibale, njengoba uPatrick Maswanganyi eyitholele elokulinganisa.
Kuphinde kwaba nezinye izinguquko esiwombeni sesithathu, umqeqeshi weBucs, uJose Riveiro, wafaka oZakhele Lepasa, u-Eva Nga, uFortune Makaringe, noBandile Shandu.
Lolu shintsho lusheshe lwasebenza njengoba uNga noMakaringe bebesho ukuyidla luhlaza iGalaxy, bengayinike thuba emuva.
UMakaringe ukhombise ikhono lakhe lokubona izikhala ngesikhathi ethola ibhola ebeligotshwe nguBandile Shandu, walidudulela enethini.
Kube uNga oqedela umsebenzi, eshaya igoli lesine elenze kwaba ngu 4-2. IPirates idlale lo mdlalo isanda kubuya eSpain la ebikhempe khona amaviki amabili.
Nakhona idlale imidlalo emithathu yobungani, yanqoba emibili, yabe seyidlala ngokulingana kowodwa.
FUNDA NALA: UKarim Kimvuidi ufisa ukuya phesheya, usengakhalela nje kwiBucs
Izophinda ibe nowokugcina wokuzizwa amandla ngoMgqibelo kaJulayi 29, bese ilinda ukuqala kweligi njengoba izovakashela iStellenbosch FC ngo-Agasti 5.
