Sekuphelile ukuqagela ngo-Aubass obehalelwa abaningi

Njabulo Shezi

IMamelodi Sundowns isimemezele ukuthi isisayinise umdlali wasesiswini obehalelwa amaqembu amaningi eDSTv Premiership uBathusi Aubaas.

U-Aubass ubedlala kwiTS Galaxy kanti ube ngomunye wabadlali abavelelile kwiPremiership ngesizini edlule. 

Lokhu kudlala kwakhe kwamdonsela amehlo abaqeqeshi beqembu lesizwe ababe sebembiza izodlala neMorocco ngoJuni. 

Wafike wadlala ibhola elinenkosi, kwasuka elikhulu isasasa ngaye njengoba ayematanisa ne-Orlando Pirates, abanye bethi usesayinile. 

U-Aubass, oneminyaka engu-28, wajoyina iGalaxy ekuqaleni kwesizini ka-2019/20 esuka kwiFree State Stars kanti ubesengumgogodla eqenjini likaSead Ramovic.

ISundowns imemezele ukuthi seyimsayinile lo mdlali ngoLwesithathu ntambama, sekusele izinsuku ezimbili iqale imidlalo yeligi. 

Ungumdlali wesihlanu kwabasayinwe iSundowns okwamanje njengoba kuvulwe iwindi lokudayiselana ngabadlali kwiPremier Soccer League (PSL). 

Isivele inoJunior Mendieta, emsayine kwiStellenbosch FC, uLucas Ribeiro obekwiSK Beveren eBelgium. 

Kukhona noLesiba Nku obekwiMarumo Gallants noThapelo Maseko obekwiSuperSport United. 

ISundowns 

Ihloma kangaka nje ivele ibophele abadlali abasezingeni elimangazayo nabangafike badlale kunoma yiliphi iqembu kwiPSL. 

FUNDA NALA: Iqhawe leBanyana uThembi Kgatlane udlale esemanzini

Kufanele ke kodwa ihlomisise ngoba kubhekwe ukuthi ivikele isicoco seligi kuleli bese iwina neseCaf Champions League esesiyihlule kaningana.