Maema: Esikutshelwe umqeqeshi ngokugxekwa kweDowns
Njabulo Shezi
Abadlalli beMamelodi Sundowns bayazi ukuthi yisizini ezoba nzima lena hhayi enkundleni nje kuphela, kodwa nangaphandle, ngokusho kukaNeo Maema.
Lo mdlali wasesiswini ukhula ngesivinini eqenjini leSundowns kanti usengomunye wezethenjwa zomqeqeshi uRulani Mokwena.
Ungomunye wabadlala kahle njengoba iSundowns isayinqobe yonke imidlalo esayidlalile kule sizini.
Kodwa noma kunjalo, kunezinkulumo ezixakayo zokuthi iSundowns ayidlali kahle kule sizini.
Abanye baze basho ngeqholo bethi iSundowns ayisafani nale yakumasizini edlule ebicoboshisa kwasani.
Mhlawumbe baqinisile ke uma ubheka ukuthi yize igcina inqobile, kodwa ayisawuphathi umdlalo.
UNeo Maema, oneminyaka engu-27, uthi lezi zinkulumo ezikhona njengamanje yinto abebevele beyilindele ngoba batsheliwe ngazo.
“Okubaluleke kakhulu kithi wukuthi sigxile kulokhu esifuna ukukuzuza,” usho kanje lo mdlali kuleli viki.
“Umqeqeshi usitshelile ukuthi ngeke kube lula kule sizini ngoba wonke amaqembu afuna ukushaya thina futhi nezinkulumo zizokwanda.
“Wathi thina okumele sikwenze wukuthi sisondelane kakhulu kunakuqala bese siqinisekisa ukuthi siyinqoba yonke imidlalo yethu.
“Nathi siyakuqonda ke lokho ngoba vele yinto okumele uyilindele leyo uma uyiqembu elikhulu,” kuchaza uNeo Maema.
Akayiboni ke nokho lento okukhulunywa ngayo uma kuthiwa abadlali kahle kule sizini njengoba ethi kusaqala isizini futhi basazolinyusa izinga.
“Kubalulekile ukuthi singabheki amagoli esiwashayile nje kuphela, kodwa nokuthi asingenelwanga goli emidlalweni emibili kule emine esesiyidlalile.
“Kubalulekile lokho ngoba isaqala isizini futhi sizogcina sifikile ezingeni elifanele.”
Ikhombisile ke nokho iSundowns ukuthi lobu bungozi bayo obese kuthiwa behlile busekhona ngesikhathi ibhabhadisa iRichards Bay ngo 4-0 emdlalweni weligi kuleli viki.
Emdlalweni olandelayo iSundowns izogadulisana neChippa United emdlalweni osubhekwe ngabomvu ngenxa yezinkulumo ezikhona ngaphambi kwawo.
Umqeqeshi weChippa, uMorgan Mammila usefunge wagomela ukuthi iSundowns izokwazi okwakhweza ikati emthini ngoMgqibelo kusihlwa.
FUNDA NALA: UMelusi Buthelezi uzolidla balizwe ngendaba ijezi kwiPirates
UNeo Maema uvumile ukuthi kuzoba wumdlalo onzima kodwa wathi sebeyihlaziyile iChippa futhi banalo icebo lokuyishaya.
