Ufuna ukuhlonipha uClive Barker ngokunqoba iMTN8
Alfred Ngubane
USteve Barker, ongumqeqeshi weStellenbosch FC, uthi ufuna ukuhlonipha umalume wakhe ongasekho emhlabeni uClive Barker ngokunqoba indebe ye MTN 8.
UClive Barker, owanqoba iCaf Africa Cup of Nations neBafana Bafana ngo-1996, ushone ngasekuqaleni kwalo nyaka.
Ngaphambi kwalokho wayenqobe iCocaCola Cup naMaZulu FC ngo-1992, okwaba wokokugcian Usuthu lunqoba indebe.
“Ubehlale engigqugquzela ukuthi kumele nginqobe indebe ngabadlali abancane enginabo,” kusho uSteve Barker ekhuluma neMpempe kuleli viki.
IStellies isisesigabeni semidlalo eyandulela owamanqamu kwiMTN8 la izobhekana khona nompeatha abavikela le ndebe i-Orlando Pirates.
USteve ukhala ngokuthi ukuze abadlali abadayisiwe eqenjini bebehlalile, bekuzoba lula kuye ukufeza lesi sifiso sikaClive Barker.
“Ngilahlekelwe abadlali abaningi kakhulu, kodwa abadlali enginabo balangazelele ukunqoba izindebe.
“Sengikhulumile nabo ukuthi ngifuna ukuthi silwele ukunqoba iMTN8. Sidlala neqembu elingomphetha bayo futhi eliqine kakhulu.
“Futhi njengoba sibashayile emdlalweni wethu wokuqala weDStv Premiership, bazoza behlehla nyova, befuna ukusibamba ngamaqhinga amasha.”
USteve Barker uyamhlonipha umqeqeshi wePirates uJose Riveiro athi ubukhali kakhulu uma kuziwa kumacebo okunqoba imidlalo.
“I-Orlando Pirates inomqeqeshi ohlakaniphe kakhulu uJose Riviero. Yingakho ngithe abadlali bethu ngiteh abadlale ngokukhululeka.”
Yize eyifuna le ndebe, uthi ngeke alwe nabadlali bakhe uma begcina behlulekile ukuyinqoba ngoba ziseziningi ezilandelayo.
FUNDA NALA: Kukhuzwa abalandeli beChiefs ngokuthuka abakwaMotaung
“Akusho ukuthi uma ngabe siphuma kule ndebe kuzomele sigoqe izandla. Kuzomele silwele ukunqoba kwezinye izindebe nokuthola indawo ehloniphekile kwiligi.
