I-Arrows yamukele ukwesula kukaVilakazi, kodwa dololo ukumbonga

IGolden Arrows ibhale umusho owodwa ezinkundleni zokuxhumana isho ukuthi iyayemukela incwadi yokwesula efakwe umqeqeshi uVusumuzi Vilakazi.

Lo mqeqeshi ushaqise abaningi ememezela ekhasini lakhe leFacebook ukuthi useyashiya kuleli qembu ngeSonto ntambama.

Ubhale umlayezo wokubonga kuleli qembu abesehlale kulo iminyaka engu-20 njengoba afika esengumdlali.

Uhamba nje ubesengumqeqeshi weqembu elikhulu abebambisene kulo noMabhusi Khenyeza.

Ubonge nosihlalo wallei qembu uMato Madlala ngakho konke athi wamenzeka khona ngesikhathi ekuleli qembu.

Impempe ibe seyibika ke ukuthi uhamba nje umfokaVilakazi ubalekela umlilo azibasele yena wona obususho ukumhangula.

Kuvele ukuthi ubenomkhuba ongemuhle wokufuna itshotsho kubadlali abasayinisayo noma abafuna ukudlala.

I-Arrows ayikasho lutho ngalezi zinsolo futhi noma isiphawula ngalokhu kuvalelisa kukaVikalazi ivele yashaya ngamafuphi ngendlela emangalisayo.

“ILamontville Golden Arrows iyakwemukela ukwesula kukaVusumuzi Vilakazi,” yilokhu kuphela leli qembu elikushilo.

Ubungalindela ukuthi kube kuningi elingakusho njengoba siside kangaka isikhathi asihlalile kuleli qembu laseThekwini.