Iphinde yazidalela iDowns kwi-Ahly, kodwa kusekude phambili

IMamelodi Sundowns iqhubekile nokukhonya kwayo uma ibhekene nezinkunzi zase-Egypt, i-Al Ahly, iyishaya ngo 1-0 ngeSonto ntambama. 

Lamaqembu abeqhuthana amazenze eLoftus Verslfed Stadium emdlalweni weCaf African Football League. 

Igoli leSundowns lishaywe uThapelo Maseko esiwombeni sesibili. Lo mdlali udedele udalimede weshodi engaphandle kwebhokisi. 

Unozinti we-Al Ahly, uMohamed El Shenawy uzwe ngenhlokomo yabalandeli ukuthi inkomo isingenile engadini, ibhola seligaxele enethini. 

Bekumele ngabe kuyiwe ekhefini iSundowns isinawo okungenani amagoli amabili ngokwamathuba ewatholile. 

I-Al Ahly beyizihlalele emuva, ifuna ukubamba iSundowns ngokuyizuma kodwa lelo qhinga alangasebenza. 

Umsebenzi ohlalele iSundowns usemningi ke nokho ngoba isazoyodlala ekuhambeni la kume idlale ngokubambana noma inqobe. 

Cishe i-Al Ahly izobe seyidlala kangcono isisekhaya futhi yazi ukuthi kumele nakanjani inqobe lo mdlalo ngamagoli amabili noma ngaphezulu ukuze ingene kowamanqamu.

FUNDA NALA: URiveiro ukhuza ulaka lwabalandeli ku-Evidence Makgopa

Akungabazeki ukuthi womabili lamaqembu ayafuna ukuba ngelokuqala ukubhalwa kule ndebe entsha yeCaf.