UMphafudi usethembe amancane ekuvimbeni iSundowns
ALFRED NGUBANE
UMarcus Mphafudi, owazakhela igama kwiMoroka Swallows neKaizer Chiefs, ubona amaqembu amancane engadlala indima enkulu ukuqeda ukuchanasa kweMamelodi Sundowns.
Kumanje iSundowns ibonakala izophinde izihambele naso kalula isicoco seDStv Premiership.
Lokhu kungenxa yokuthi iqembu obekubhekwe ukuthi liyidlisele ogageni, i-Orlando Pirates, liyashumpuluza nje kule sizini kwiligi.
UMphafudi, owayedlala esiswini, usola ukuthi ukhiye wokunqanda iSundowns sewuyoqhamuka kuwo lamaqembu athathwa ngamancane.
Nokho nakuwo ubona kusenokhula okumele alihlakule kuqala ngaphambi kokuthi abe sezingeni elifanele.
“Amaqembu amancane awasenabo abadlali abaphambili njengakuqala,” kusho uMphafudi engxoxweni ekhethekile neMpempe.
“Kudala bewazi kahle ukuthi uma ngabe uzodlala ne-African Wanderers, uzothola abadlali abafana noTholomuzi Blose, Siyabonga Nomvete nabanye.
“Uma uthi ushona eMthatha kwiBush Bucks uzothola oWilliam noWilfred Mgugeyi, Brandon Augustine, Fezile Lemomo, Vincent Sokhela, Lebo Morula…
“KwiVaal Professional kukhona oJabu Mnguni, Robinson Seakamela, Ronnie Jowa, David Vukubi, Fortune Koloba.”
UMphafudi uthi uma lamaqembu amancane engabuyela ekutheni azihlonzele abadlali abasezingeni abasebancane bese ezikhulisela bona, engagcina esezingeni elihle.
Uveze isikhalo esigcwele izwe lonke ebholeni sokuthi uma iSundowns ingenalo iqembu ezoncintisana nalo kwiligi, imidlalo yalesi sigaba izogcina ingasenamsoco.
FUNDA NALA: Ikuphindile lokho i-Xcel itholela uJanet Mbele abaxhasi
Kumanje iqembu elisondelayo kwiSundowns yiGolden Arrows kaMabhuti Khenyeza neSuperSport United.