UKatsande weluleka u-Ox ngokumele akuqaphe kwiChiefs
Isihlabani sakudala seKaizer Chiefs, uWillard Katsande, sesikhiphe iseluleko esiqinile sisibhekise kuSibongiseni “Ox” Mthethwa.
UKatsande weluleka lo mdlali osanda kufika kwiChiefs ukuthi angalinge azame ukuzenza yena, kodwa abe u-Ox lo awuye.
U-Ox, okuyigama lesidlaliso likaMthethwa, usayine kwiChiefs ngoSepthemba, sekuphele iminyaka emibili uSalt and Vinegar ashiya kuleli qembu.
“Ngesikhathi ngifika kwiChiefs ngafika nginguWillard Katsande, ngakhipha lokho enginakho ngaphandle kokuzama ukulingisa isitayela sabadlali baphambilini abafana no(Tinashe) Nengomasha nabanye.
“Kuyangijabulisa ukuthi abantu basakhuluma ngamagalelo ami noma sengiwalengise emgibeni amakhokho.”
UKatsande weluleke u-Ox ngokuthi angazixakekisi ngokuthi elalele abathi sikhulu lesi sikhala okumele asivale.
“Le ndaba yokuthi u-Ox kumele avale isikhala sami ayikho nje ngoba mina angizange ngishiye sikhala.
“Ufike nesitayela sakhe, futhi akumele anake abamqhathanisa nami. U-Ox udinga ukuzakhela elakhe igama ngendlela yakhe, hhayi ukuba uKatsande omusha.”
Nokho umncomile ke lo mdlali odabuka eMtshezi, ethi iChiefs ibingeke imsayinise ukube ubengekho ezingeni eliphezulu.
Kodwa ukugcizelele ukuthi u-Ox akumele azizwe ecindezelwa wumlando kaKatsande eNaturena.
“Akumele athuswe engikuzuzile. Ungumdlali wasesiswini osezingeni eliphezulu, futhi kumele akhumbule njalo ukuthi iChiefs imsayinise ngethalente lakhe.
“U-Ox akumele ashintshe ukuthi ungubani ukuze afane nalesi simo engake ngangena kuso ngoba abaningi abadlali bayaduka bezama ukulingisa abanye.”
UKatsande ubona uMthethwa njengomdlali oseqophelweni eliphezulu, ongakwazi ukukhuphula iChiefs.
Umphonsele inselelo ukuthi aqhubeke nendlela yakhe yokudlala, egcizelela ukuthi u-Ox akumele aziqhathanise noKatsande noma nabadlali basesiswini baphambilini.
FUNDA NALA: UHunt uthi bazigwaze ngowabo beshaywa yiDowns
UMthethwa, oneminyaka engu-29, uqale imidlalo emine kweyisihlanu ayidlale kwiChiefs kule sizini.
