IMali ingayikhinyabeza iBafana kwi-Afcon

SIHLE NGUBO

Umyalezo usobala okwempahla yembuzi. IMali iyingozi futhi iBafana Bafana kuzomele izibambe ziqine uma isibhekene nayo emdlalweni wayo wokuqala kwi-Africa Cup of Nations (Afcon). 

IMali ithumele umyalezo oqinile emaqenjini ezobhekana nawo kuGroup E ngesikhathi ibhaxabula iGuinea Bassau ngo 6-2 kowokulungiselela i-Afcon ngempelasonto. 

Amanye amaqembu akhona kuGroup E yiNamibia neTunisia – nawo ayingozi ngokwawo.

Leli lizwe yilona elizovivinya iBafana kuqala njengoba bezotholana phezulu emdlalweni we-Afcon kaGroup E ngoJanuwari 16. 

Yilapho kuzocaca khona ukuthi indlela yeBafana ibheke kuphi nokuthi kuhlale kubalulekile ukwenza kahle emdlalweni wokuqala.

Ngasohlangothini lweGuinea Bassau iseqoqweni elilodwa neNigeria emidlalweni ye-Afcon. 

La maqembu asehlangane kayisishiyagalombili kodwa iBassau ayikaze iwine nowodwa umdlalo.

INigeria seyiwine imidlalo emihlanu kwathi emithathu bayidlala ngokulingana. Nokho imidlalo yobungani ayichazi okuzofike kwenzeke kwi-Afcon ngoba isimo sisuke sesihluke kakhulu.

IBafana izodlala umdlalo wobungani neLesotho eLucas Moripe Stadium ngoLwesibili. Nokho kulo mdlalo abalandeli nabezindaba bazobe bengavunyelwe.

Imidlalo ye-Afcon izoqala ngoJanuwari 13 ize isongwe ngoFebhuwari 11.

FUNDA NALA: UNgezana uphawula ngokushelwa kwakhe elaseFrance

I-Caf  ikhuphule imali ngo-40% nokwenza ukuthi kulindeleke ibhola elihle e-Ivory Coast.