U-Ox Mthethwa usekulungele ukuba yinkunzi kwiChiefs
Umdlali wasesiswini weKaizer Chiefs, uSibongiseni Mthethwa, uthembise ukuthi uzobuyela esimeni sakhe sakudala uma sekuqhubeka imidlalo yeDStv Premiership ngenyanga ezayo.
Uthi manje usezinze kahle kuleli qembu laseNaturena kanti usizwe yikhefu le-Africa Cup of Nations (Afcon) eliqhubekayo e-Ivory Coast.
USibongiseni Mthethwa Mthethwa ujoyine Amakhosi esuka kwiStellenbosch ngoSepthemba kodwa akakakwazi ukubuyela efomini yakhe kulezi zinkunzi zaseSoweto.
Ikhefu le-Afcon limnike isikhathi esanele sokuthi ajwayelane kangcono nozakwabo nangendlela izinto ezenziwa ngayo kuleli qembu kanti uthe usethuthuke kakhulu.
“Leli khefu lingisizile ukuthi ngazi ukuthi izinto zenziwa kanjani lapha,” kusho uMthethwa, odume ngelika-Ox.
“Futhi ngibazi kangcono abadlali ngoba bengingazange ngibe nabo ngesikhathi kulungiselelwa isizini.
“Leli khefu selisisize kakhulu ukuthi siqinise ubudlelwano njengeqembu futhi besibona izinto ngendlela ehlukile.”
Ngenxa yengcindezi ehambisana nokudlalela Amakhosi, lo mdlali oneminyaka engu-29 wengeze ngokuthi ngeke avumele udumo lumphazamise.
“Yebo, kunengcindezi lapha nakwamanye amaqembu, kodwa ngeke kufane ngoba iqembu lisenenkinga yokuwina izindebe,” usho kanje.
“Sisebenza kanzima kulokho ukuqinisekisa ukuthi sisiza iqembu ukuthi linqobe izindebe ngoba iyona kuphela ingcindezi esinayo – eyokunqoba indebe.
“Engingakusho ngengcindezi wukuthi igcwele yonke indawo.
“Noma ngabe udlala kuphi, uzothola ingcindezi ngoba kuhlale kulindelwe okuthile ngaso sonke isikhathi.”
UMthethwa uphinde wathi bahlela ukuqhubeka lapho begcine khona ngonyaka odlule benqoba imidlalo emithathu badlala ngokulingana kanye emidlalweni emine ngaphambi kwekhefu.
“Into abantu abangayilindela kithi uma sesibuya yindlela esiqede ngayo ngonyaka odlule…
“Siqhubeke nomqondo ebesinawo wokuthi sikwazi ukunqoba imidlalo.
“Ngakho sifuna ukuqhubeka sisuka lapho ukuze siqinisekise ukuthi siyayiwina imidlalo ngaso sonke isikhathi futhi singaguquki ukuze sibe semaqenjini amathathu aphezulu (kwilogi).
FUNDA NALA: Kuminciwe kwiMorocco neBafana ngabadlali abalimele
“Sikwazile ukuzilungiselela ngesikhathi sekhefu futhi kufanele senze isiqiniseko sokuthi siqhubeka lapho sigcine khona.”
