Usetholelwe usizo uKhenyeza kwi-Arrows ecwilayo
IGolden Arrows seyibuyise uSteve Komphela ukuba azosebenzisana noMabhuti Khenyeza ukuzama ukubuyisela isio kwesifanele.
I-Arrows seyiqophe elayo irekhodi elingelihle njengoba seyihlulwe imidlalo engu-11 kulandelana.
Lokhu sekuyishove odakeni lwezembe njengoba kumanje isendaweni ka-12 ngamaphuzu angu-23 emidlalweni engu-19.
Ngokuthola kweMpempe, uKomphela wethulwe kubadlali be-Arrows ngoLwesine ekuseni njengoba ezoqala umsebenzi.
Bekungakacaci ke ukuthi ngabe uzoba ngumqeqeshi bese uKhenyeza abe yiphini noma bazosebenza ngokubambisana yini.
Imizamo yokuxhuma abe-Arrows ukuthola kabanzi ngalezi zindaba ayiphumelelanga kwaze kwaba siyashicilela.
Nokho umthombo osondelene naleli qembu usiqinisekisile ukuthi uKomphela usefikile futhi uzoqala ukusebenza ngawo uLwesine.
Umdlalo wakhe wokuqala uzoba ngeSonto ekuhambeni la bezobhekana khona nePolokwane City.
Akukhona ke okokuqala uMphathi, okuyigama lesidlaliso likaKomphela, esebenza kwi-Arrows.
Ubesebenza kuyo ngaphambi kokuthi alandwe yiMamelodi Sundowns eminyakeni emine edlule.
FUNDA NALA: Amahloni kuRiveiro iPirates ishaya udaka ngaphambi kwedabh
Ekuqaleni kwale sizini ubekwiMoroka Swallows kodwa wakhululwa ngasekuqaleni kwalo nyaka kulandela ukungasebenzisani kahle nabaphathi bayo.
