UMokwena ubhoboke ngesifiso sokuba yiphini likaMazinyo
Umqeqeshi weMamelodi Sundowns, uRulani Mokwena, uzwakale ebhuqa uzakwabo u-Ernst Middendorp ethi esinye sezifiso zakhe wukuba yiphini lalo mqeqeshi odabuka eGermany.
UMokwena uveze lesi sifiso ngesikhathi ekhuluma ngemuva komdlalo wezakhe la zibambane khona neSuperSport United ngoLwesibili.
Uthe uyamthanda uMiddendorp wabe esekhipha lamazwe azwakale ewukubhuqa kulandela ukuthi uMiddendorp ethe abukho ubungani kubaqeqeshi bakuleli.
FUNDA NALA: Kuneqembu lePremiership elicathamela abadlali beMilford
UMiddendorp ukusho lokhu ngeledlule ngemuva kokuthi ecishe wabambana ngezandla noJose Riveiro we-Orlando Pirates muva nje.
“Elinye lamaphupho okuba yiphini lika-Ernst Middendorp, ngimfonela kakhulu ukuze nje ngikhulume naye futhi uyakwazi lokho,” kusho uMokwena.
“Ngiyamthanda, ngiyayithanda indlela acabanga ngayo kusukela ebuye kulo msebenzi abewenza eThailand…
“Indlela abuka ngayo izinto iyamangalisa. Usanda kukhuluma ngokuthi asibambisene singabaqeqeshi eNingizimu Afrika.
“Ngethemba ukuthi mina ungibona njengozakwabo azwanayo naye, ungithatha njengozakwabo.
“Ngimkhonze kakhulu. Kumele ngikusho futhi ukuthi kusengelinye lamaphupho ami ukuba yiphini lakhe.”
Ngemuva kokuxabana noRiveiro, uMiddendorp uthe akakaze axabane nozakwabo abafana noGiovanni Trapattoni, Otto Rehhagel, Franz Beckenbauer noJürgen Klopp ngesikhathi esasebenza kwiBundesliga.
“Ukuzwana phakathi kwabaqeqeshi eNingizimu Afrika akukho, asicacise futhi sikhulume iqiniso,” kusho uMiddendorp ngeledlule.
