Isinqumo seChippa ngenkundla yoweNedbank Cup
SIHLE NGUBO
IChippa United ngeke iwuyise eBuffalo City Stadium, umdlalo wayo obalulekile owandulela owamanqamu weNedbank Cup, ezowudlala ne-Orlando Pirates.
Lokhu kuhlaluke esitatimendeni esikhishwe yileli qembu ngoLwesibili, lapho belicacisa ngemidlalo elizoyidlalela ekhaya ngoMeyi.
IChilli Boys idlalele umdlalo wayo weDStv Premiership neKaizer Chiefs eBuffalo City Stadium, okuyinkundla encane futhi engenabo utshani obuhle.
Kubukeke kabi kakhulu ngoba nezulu beliyishaya, inkundla yaba mapetupetu ngemuva kwemizuzu embalwa kuqale umdlalo.
Imidlalo emikhulu iChippa iyidlalela eNelson Mandela Bay Stadium, ngakho kwamangaza ukusa kwabo iChiefs eBuffalo Stadium.
Sekungumlando ukuthi iChiefs yabuya iphoxekile eBuffalo City Stadium ngemuva kokuthelwa othulini yiChippa ngo 2-0.
“I-Easten Cape izokwamukela amaqembu amabili amakhulu aseSoweto, evikini elilodwa ngoMeyi,” kusho isitatimende esikhishwe yiChippa United.
“Kuzoqala umdlalo weMoroka Swallows weDStv Premiership eBuffalo City Stadium, ngoMeyi 1, okuyiholide, ngo-3 ntambama.
“Kuzobe sekulandela i-Orlando Pirates eNelson Mandela Bay Stadium, ngoMeyi 4, emdlalweni owandulela owamanqamu weNedbank Cup, ozoqala ngo-3 ntambama.”
I-Premier Soccer League (PSL) ibingakamemezeli ngokusemthethweni ukuthi imidlalo eyandulela owamanqamu weNedbank Cup izodlalelwa kuphi, nini.
FUNDA NALA: UJordaan uveza okusha ngekusasa lomqeqeshi weBanyana
Komunye umdlalo kuzotholana phezulu iStellenbosch FC neMamelodi Sundowns eKapa. Umdlalo wamanqamu useMbombela Stadium ngoJuni 1.
