Akekho onendaba namarekhodi, awanandondo – Mokwena

Umqeqeshi weMamelodi Sundowns, uRulani Mokwena, kusele kancane aqophe irekhodi okungenzeka lihlale iminyakanyaka.

Lelo rekhodi elokuqeda imidlalo yeDStv Premiership engazange ahlulwe nakanye.

ISundowns isalelwe yimidlalo emine kuphela ukuthi ilibeke lelo rekhodi, kodwa uMokwena akanandaba nalo.

Asevele maninig amarekhosi iSundowns ewaphulile, yaqopha amasha.

Ekhuluma ngemuva kokushaya iRoyal AM ngo 1-0 eLucas Moripe Stadium ngoMgqibelo ebusuku, uMokwena uvele wazihlekela uma ebuzwa nganarekhodi.

“Amarekhodi awasho lutho, akukho muntu onendaba nawo – awanazo izindebe,” kusho uMokwena enikina amahlombe ezihlekela.

Kulo mdlalo wangoMgqibelo kuke kwabukeka iSundowns izophuma ingawatholanga amaphuzu agcwele.

Elinye lamarekhodi ewahubhayo elokuqokelela amaphuzu amaningi asake aba khona kwiligi yakuleli.

Kodwa kuthe iRoyal AM seyithembile, kwaqhamuka uPeter Shalulile umdlalo usuyophela, walibasela enethini.

Umqeqeshi weRoyal AM, uJohn “Vuli’gate” Maduka ukhale ngokuthi bayiphile iSundowns leli goli.

Kusangenzeka ke nokho iSundowns ingatholi leli rekhodi okufanele ukuthi ilibheke kakhulu.

Phela kule midlalo emine esele kukhona amaqembu amabili avamise ukuyimisa iSundowns okuyiTS Galaxy neStellenbosch FC.