EzakamuvaIbhola

ICitizens izobonga abalandeli ngokuvulela isibhaxu kwiBay

Usihlalo weCape Town City, uJohn Commitis, usezwakalise ukubonga kubalandeli ababesekayo yize izinto zingahambanga kahle kule sizini esongwayo.

ICitizens bekulindeleke lukhulu kuyona kule sizini ngemuva kokukhombisa ukuya phambili kumasizini edlule.

Nokho iqembu eliqeqeshwa u-Eric Tinkler akulihambelanga njengoba belihlelile kulokhu.

ICitizens izothola isendaweni yesikhombisa ngamaphuzu angu-37 emidlalweni engu-28, njengoba sekusele imidlalo emibili kusongwe isizini.

NgoMgqibelo izobhekana neRichards Bay, evika ukuyodlala eyokuhlunga, eDHL Cape Town Stadium, ngo-3 ntambama.

UCommitis uthe bafuna ukubonga abalandeli babo kulo mdlalo.

“Njengendlela yokubonga nokubona ukwesekwa okuqhubekayo, abadlali sebenqume ukukhokhela amathikithi enu,” kusho uCommitis.

“Ngakho umdlalo wethu wasekhaya wokugcina kuzongenwa mahhala kuwona. Lena yindlela yokubonga abalandeli bethu abathembekile.

“Lokhu kusho ukuthi kumele uye eTicketPro online uyothola amathikithi akho.

“Kuzoba nesibalo esithile samathikithi ngakho kumele niphuthume. Siyadinga ukuthi niseseke kulo mdlalo wokugcina ekhaya.”

Lo sihlalo akalilahlile ithemba lokuthi bazoqeda endaweni engcono kwilogi uma benqoba imidlalo emibili esele.

“Ngithemba ukuthi sizoqeda kahle, siqede endaweni yesine noma eyesihlanu,” kusho yena.

“Asibanga nesizini enhle kodwa ngiyethembisa ukuthi kuningi okuhlelwayo ukulungiselela isizini ezayo.

“Ngethemba ukuthi ngizonibona emdlalweni wethu lapho sizobhekana neRichards Bay. Ngiyabonga.”

IBay kumele iwunqobe nakanjani lo mdlalo, kungenjalo izodlala eyokuhlunga ekupheleni kwesizini.

ICitizens izovala imidlalo yeligi ngokubhekana nompetha beligi iMamelodi Sundowns, eLoftus Stadium, ePitoli, ngoMeyi 25.