UMngqithi uthi akayona inhloko yabaqeqeshi kwiSundowns
UManqoba Mngqithi, ongumqeqeshi weMamelodi Sundowns, uthi yena usabambile njengoba iqembu lilungiselela isizini entsha, akayona inhloko yabaqeqeshi.
Ukuhamba kukaRulani Mokwena, osecija iWydad Athletic Club yaseMorocco, kwenze ukuthi iSundowns yamemezela ukuthi uMngqithi uyena ozobamba njengoba kulungiselwa isizini entsha.
Ngemuva kwalokho leli qembu libuyise uSteve Komphela obeseqeqesha iLamontville Golden Arrows, laphinde lalanda uRomain “Fohloza” Folz owake wayibamba kuMaZulu FC neMarumo Gallants.
“Okokuqala kuyinto enkulu kimina ukunikwa ithuba lokuhola iqembu, yize ngisabambile nje,” kusho uMngqithi kwiSuperSport TV.
“Ngizama ukuqinisekisa ukuthi amalungiselelo esizini entsha ahamba ngendlela efanele. Kusukela ekuqaleni kokulungiselela isizini kuze kube yimanje, ngicabanga ukuthi konke kusahambe kahle.
“Ngenhlanhla akukho ukulimala esibe nakho kulesi sikhathi. Cisho kuwona wonke amalungiselelo esizini entsha umdlali olimele esinaye uSipho Mbule.
“URonwen (Williams) ufike ekhempini yokulungiselela isizini entsha evele elimele. Ngaphandle kwalokho konke kuhambe kahle.”
Umbuzo omkhulu owokuthi phakathi kukaMngqithi, uKomphela noFolz, ubani oyinhloko yabaqeqeshi kwiSundowns.
ISundowns ibise-Austria lapho ibilungiselela khona isizini entsha. Izovula isizini ngokubhekana nePolokwane City emdlalweni weMTN8 eLucas Moripe Stadium ngo-Agasti 11.