U-Itumeleng Khune usethole ikhaya elisha ebholeni
SIHLE NGUBO
Kubukeka sekuphele nya ngokuthi u-Itumeleng Khune abonakale enkundleni edlala ibhola kulandela ukuqashwa kwakhe njengomhlaziyi kwiSABC.
Lo nozinti, ohlale kwiKaizer Chiefs impilo yakhe yonke edlala ibhola, kuvela ukuthi uzosebenza noJabu Mahlangu phakathi kwizenye izingwazi zebhola ezizohlaziya kwiSABC.
Lokhu kulandela isivumelwano phakathi kweSuperSport neSABC sokunika inhlangano esemthethweni yezokusakaza kuleli imidlalo engu-51 ezoyisakaza bukhoma kule sizini ka-2024/2025.
Ngokwalesi sivumelwano iSABC izosakaza imidlalo yeBetway Premiership engu-23, eyeBlack Label Cup eyishumi, eyeNedbank Cup engu-12 neyisithupha yeNational First Division (NFD). Ngempelasonto iSABC iwusakazile umdlalo obubhekwe ngabomvu weBetway Premiership phakathi kweMarumo Gallants neKaizer Chiefs.
UKhune bekulokhu kulindelwe ukuthi kucace ngekusasa lakhe kwiChiefs njengoba sekuqale isizini. Nokho sekuhlalukile kodwa izinsuku zakhe zokudlala ibhola sezifinyelele esiphethweni njengoba esezohlaziya kwiSABC.
Le nhlangano ivamise ukusebenzisa inkakha uDoctor Khumalo, umqeqeshi uSimphiwe Dludlu noHlompo Kekana, owayedlalela iMamelodi Sundowns, uma kudlala imidlalo yeBafana Bafana, eyeCaf Champions League neCaf Confederation Cup.
NgoLwesibili umdlalo obheke kakhulu owokuvula isizini phakathi kompetha iMamelodi Sundowns nomakhelwane bayo iSuperSport United. Lo mdlalo ungo-7.30 ebusuku kanti akwaziwa noma ukhona yini kule ezovezwa yiSABC kule sizini.
