IBafana Bafana

Ngabe sekuphelile ngowoSuthu kwiBafana Bafana?

SIHLE NGUBO 

Kungenzeka ukuthi sekuphelile ngonozinti waMaZulu FC, uVeli Mothwa, eqenjini lesizwe laseNingizimu Afrika, iBafana Bafana.

Lo nozinti akekho esikwatini sikaHugo Broos sakamuva esizodlala imidlalo yokuhlunga ye-Africa Cup of Nations (Afcon).

UMothwa wenze iphutha iBafana ibhekene ne-Uganda kowokuhlungela i-Afcon e-Orlando Stadium. Lowo mdlalo wagcina uphele ngo 2-2.

Lo nozintini ubuyele eqenjini lakhe AmaZulu waphinde wenza elinye iphutha bagcina bedliwe ngo 2-1 yiPolokwane City.

Ngemuva kwalokho Usuthu lunqume ukungamdlalisi uMothwa njengoba sekuvimba u-Olwethu Mzimela.

Nokho izinto azihambi kahle kuleli qembu laseThekwini. Lisahlulekile ukunqoba emidlalweni emithathu yeBetway Premiership.

Ngaphezu kwalokho Usuthu lusanda kuhlukana nobengumqeqeshi uPablo Franco waseSpain, ngenxa yakho ukushaywa imidlalo emithathu ilandelana.

IBafana izobhekana neCongo emdlalweni wokuhlungela i-Afcon eNelson Mandela Bay, ngo-Okthoba 11, bese kuthi ngo-Okthoba 15 la mazwe aphinde ahlangane ekuhambeni.

Selilonke iqembu limi kanje:

Onozinti: Ronwen Williams, Ricardo Goss, Sipho Chaine

Izitobha: Sydney Mobbie, Khuliso Mudau, Fawaaz Basadien, Grant Kekana, Aubrey Modiba, Rushwin Dortley, Nkosinathi Sibisi, Thabiso Sesane.

Abasesiswini: Teboho Mokoena, Jayden Adams, Thalente Mbatha, Luke Le Roux.

Amafolosi: Oswin Appollis, Themba Zwane, Patrick Maswanganyi, Iqraam Rayners, Elias Mokwana, Lyle Foster, Relebohile Mofokeng, Thapelo Morena.