URulani Mokwena kusemome axoshwe yiWydad
SIHLE NGUBO
URulani Mokwena angase azithole ekhonjwa eza ngayo njengoba kucaca ukuthi akumhambeli kahle neze kwiWydad Athletic Club, yaseMorocco.
Kuphinde kwakhala induku kwezikaMokwena kulandela ukushaywa yiRS Berkane, ebisidlala ngabadlali abayishumi, ngo 1-0 ngoMgqibelo. Ukunqoba kweRSB kuyinyusele esicongweni selogi yeBotola Pro.
Ngasohlangothini lweWydad idonsa kanzima impela ngemuva kwemidlalo eyisishiyagalombili yeligi. Seyinqobe emithathu, yadlala ngokulingana emibili yase ishaywa kowodwa.
Lokhu kuyenza ihlale endaweni yesikhombisa kwilogi yeBotola Pro. Kuyaziwa ukuthi leli qembu liyakhiwa ngemuva kokungenzi kahle ngesizini edlule.
Nokho okunye okwaziwayo ukuthi abaphathi bamaqembu asenhla ne-Afrika abalilindi ibhadi uma iqembu lingayitholi imiphumela emihle – bayamxosha umqeqeshi.
Phakathi nesonto ezikaMokwena zithelwe othulini ngo 2-0 yiCODM. Lokhu kuchaza ukuthi iWydad ishaywe kabili imidlalo ilandelana.
NgoMgqibelo uMokwena uphume enkundleni esegadwe onogada ngenxa yolaka lwabalandeli beWydad abebedinwe begane unwabu.
Lokhu akukuhle kulo mqeqeshi obecija iMamelodi Sundowns ngesizini edlule njengoba kuvela ukuthi useke waba nomhlangano nabaphathi beqembu ukudingida yona indaba yemiphumela engahambi kahle.