U-Ertugral ethubeni lokushaya iPirates, ngemuva kokujezisa iChiefs 

SIHLE NGUBO 

Umqeqeshi omusha weCape Town City, uMuhsin Ertugral, ubuye kwezwakala kwiPremier Soccer League (PSL) ngesikhathi eshaya iqembu lakhe lakudala iKaizer Chiefs ngo 1-0 eKapa, ngeSonto.

U-Ertugral uthathe izintambo kwiCityzens kulandela ukuxoshwa kuka-Eric Tinkler, ngenxa yokungavumi kwemiphumela selokhu kuqale isizini.

Ngesikhathi ethulwa yiqembu laseKapa u-Ertugral, kuthiwe uzoba yiTechnical Director yeqembu kodwa uzobamba njengomqeqeshi kuze kuphele isizini.

Lo mqeqeshi, owake wacija ne-Ajax Cape Town, unethuba lokuphinde ashaye elinye iqembu leseSoweto aseke waliqeqesha, i-Orlando Pirates.

Ezika-Ertugral zizotholana phezulu neBucs emdlalweni weBetway Premiership, eDHL Cape Town Stadium, ngoLwesithathu ngo-7.30 ebusuku.

I-Pirates ayifani nokho neChiefs njengoba ishayela phezulu emidlalweni yePremieship selokhu kuqale isizini. Isendaweni yesibili kwilogi kanti ukunqoba ngoLwesithathu kuzoyibeka esicongweni selogi yePremieship.

U-Ertugral wagcina ukuqeqesha iPirates ngoNovemba ka-2016. Wamangaza abalandeli bebhola abaningi baseNingizimu Afrika esula kwithelevishini ngemuva kokuthi iBucs ibhaxwe yiSuperSport United ngo 6-1.

Ukunqoba kuka-Ertugral ngoLwesithathu akungabazeki ukuthi kunganika yena njengomqeqeshi, neqembu lakhe, ukuzethemba okuphindiwe njengoba imidlalo yePremieship iqhubeka.

Umdlali weCityzens okumele aqashelwe kakhulu yiPirates, uJaedin Rhodes. Lo mdlali akakwesabi nhlobo ukuqonda izitobha avule indlela.

Ngasohlangothini lwePirates uRelebohile Mofokeng kulindeleke ukuthi abe yiphela endlebeni kubadlali basemuva beqembu laseKapa.