I-PSL isigcine iyixoshile iRoyal AM kwiligi 

SIHLE NGUBO 

Ngemuva kokutotosa iRoyal AM isikhathi eside iPremier Soccer League (PSL) seyigcine ilixoshile ngokusemthethweni leli qembu likaShauwn Mkhize.

I-PSL izamile ukunika iThwihli Thwahla ithuba lokuthi ithengwe bese idlale imidlalo eyisalele kodwa kwagcina kungalunganga.

Esitatimendeni esikhishwe yiPSL ngoLwesithathu iveze ukuthi yenze konke ukuhlangabeza leli qembu kodwa kwanhlanga zimuka nomoya.

Ibeke la maphuzu alandelayo ngokuchitha kwayo iRoyal AM:

*IRoyal AM iyehluleka ukugcina ukuzibophezela kwayo kwiligi 

*IRoyal AM ayifakanga imininingwane eyiqiniso ngesikhathi ifaka isicelo sokuvuselela ngoJulayi 1 ka-2024.

*IRoyal AM idlulise amasheya ngendlela ephambene no-Article 14.6 womthethosisekelo weNSL.

“Ngenxa yalokho ikomiti eliphezulu libe selithatha isinqumo sokubuhoxisa ubulungu beRoyal AM kwiBoard of Governors yeligi ngokulandela u-Article 10.16/10.14/14.6 womthethosisekelo weNSL,” kwenaba isitatimende.

“IRoyal AM namaqembu (ePSL) bazokwaziswa ukuthi umhlangano uzoba nini njengokwencwadi elawula iNSL.”

Kulo mhlangano kulindeleke kucaciswe ukuthi kuzokwenzekani ngamaphuzu atholwa amaqembu adlale neThwihli Thwahla kule midlalo engu-11 eyidlalile.