IStellies iphinde yashaya Usuthu emdlalweni wePremiership
SIHLE NGUBO
IStellenbosch FC iphinde yaqoqa amaphuzu amathathu kuMaZulu FC inqoba ngo 1-0 emdlalweni weBetway Premiership, eDanie Craven Stadium, eKapa, ngoLwesibili ebusuku.
Usuthu bese kungokwesibili lushaywa yiStellies kule sizini. NgoJanuwari 23 leli qembu laseKapa libukise ngaMaZulu liwabhaxabula ngo 5-0 eThekwini.
Ngokunqoba lo mdlalo iStellenbosch inyukele endaweni yesithathu kwilogi yePremieship.
Igoli leqembu lasekhaya lishaywe uSanele Barns ngomzuzu ka-29. Uthole ibhola ngemuva kokushayisana kukakaputeni wosuku uRamahlwe Mphahlele nonozinti uRichard Ofori.
Ngokushaywa kulo mdlalo Usuthu luyeke ithuba lokusuka endaweni yesikhombisa luye kweyesithupha.
AmaZulu angazithola ehlela endaweni yesishiyagalombili uma iKaizer Chiefs ishaya iChippa United emdlalweni weBetway Premiership ngoMgqibelo eNelson Mandela Bay Stadium.
