IDurban City seyilaxaze inqwaba yabadlali abayinyusele kwiPremiership
SIHLE NGUBO
Kubukeka sengathi abaphathi beDurban City ababanga nakho ukwethembeka kubadlali abakhuphule iqembu balibeka kwiBetway Premiership, lisuka kwiMotsepe Foundation Championship ngesizini edlule.
Kuvela ukuthi abadlali abaningi baxoshwe kabuhlungu kuleli qembu njengoba kungabanga khona nezingxoxo nabo ukuthi kuzokwenzekani ngesizini ezayo.
Ngokomthombo weMpempe abadlali abaningi abakhuphule iCity, ababonwa nangakhalo uma leli qembu liziqeqesha njengoba kulungiselelwa isizini entsha.
Kuthiwa inqwaba ikhishiwe kwiGroup yeqembu kuWhatsapp, kanti iningi labadlali beziphela izinkontileka zabo ngoJuni.
Abadlali abangabange besabuyela kwiCity uDumisani Msibi, uSanele Gaxa, uSiyavuya Ndlovu, uJoslin Kamakuta…
UMusa Nkosi, uMbuso Mdakane, uMphakamiseni Nene, uVictor Bakah…
UXolani Slawula, uSifiso Mbidane, uRuzaihg Gamaldien noSiphamandla Nzuza.
Kukhona nabakade bebolekisiwe ababuyele emaqenjini abo ngemuva kokuphela kwesizini.
Kulabo kukhona uVuyo Phewa, uSiyanda Hlangabeza, uSenzo Ndlovu, uMenzi Ndwandwe no-Olwethu Mzimela.
Lesi senzo seCity sibukeka singenabo ubuntu uma kubhekwa indlela abalwe ngayo laba badlali ukusiza iqembu linqobe isicoco seligi.
Akukapheli namasonto amangakhi iCity ihlukene nomqeqeshi oyisize yakhuphuka, uSimo Dladla.
Ngokwesitatimende esikhishwe yiCity bazamile ukuxoxisana nalo mqeqeshi kodwa bangakwazi ukuvumelana ngokuthile ezingxoxweni ababe nazo.
Akucacanga ukuthi yini abebengavumelani ngayo kodwa kusolakala ukuthi abazwananga ngemali.
UDladla usezoba yiphini lomqeqeshi kuMaZulu FC, kanti iCity seyilande uGavin Hunt oxoshwe yiSuperSport United, esidayisiwe, ngesizini edlule.
Impempe izamile ukuthola usihlalo we City, uFarook Kadodia, ukuthi acacise ngabadlali abafikayo nabahambile kodwa ucingo lwakhe belukhala lungaphendulwa.
Akazange aphendule nakuWhatsapp lapho ethunyelwe khona umyalezo yintatheli mayelana nalokhu daba.
