ISharks izoya kwiBulls seyihlome ngabanqobe neJunior Boks
SIHLE NGUBO
IHollywoodbets Sharks izozama ukuvuka izithathe uma seyitholana phezulu neVodacom Blue Bulls emdlalweni wesibili weCarling Currie Cup, eLoftus Stadium, ngoMgqibelo ngo-5.10 ntambama.
Iqembu laseThekwini liyivule ngesibhaxu imidlalo yeCurrie Cup kulandela ukubhaxabulwa yiLions kabuhlungu ngo 46-5 e-Ellis Park Stadium, ngempelasonto edlule.
Umqeqeshi uJP Pietersen uzojabulela ukwengeza ngabanye abadlali abasebancane abasanda kuphumulela ezingeni lomhlaba.
UJaco Williams, uSimphiwe Ngobese, uMatt Romao noSimphiwe ‘Vusi’ Moyo bafakiwe eqenjini labangu-23 kulandela ukwenza kahle neJunior Boks, kwi-Under 20 World Championship.
UWilliams, owazi kahle ukuthi ungakuphi umugqa we-try, ufakwe ophondweni endaweni kaKhuthi Rasivhaga ozoba sebhentshini.
UNgobese yena uzongena kwi-prop, kanti uRomao uzobe esebhentshini njenge-flank.
UMoyo, naye ozoqala ebhentshini, ushaye into ecokeme kwiJunior Boks ngokukhahlela, ukuphasa kahle nokuba namandla.
Ushaye ama-conversion amabili namaphenathi amathathu, waba namaphuzu angu-13, ngesikhathi iqembu lakuleli lishaya iJunior All Blacks ngo 23-15 kowamanqamu. Uqobele phakathi amaphuzu angu-63 emqhudelwaneni wonke.
Abadlali abazokwengeza amava kwabaphambili uCorne Rahl kwi-lock noTink Mavesere abazoqala umdlalo.
Bazongena endaweni kaGideon Koegelenberg noMawande Mdanda.
ULee-Marvin Mazibuko omunye umdlali ikhona eqenjini. Lo mdlali oneminyaka engu-28, oke wayibamba kwiWestern Province neStormers, usanda kubuyela eNingizimu Afrika ngemuva kwesizini ekwiRacing 92 eFrance.
IHollywoodbets Sharks XV:
Phatu Ganyane
Bryce Calvert
Lee-Marvin Mazibuko
Corne Rahl
Deon Slabbert
Tino Mavesere
Jannes Potgieter
Nick Hatton (Capt.)
Bradley Davids (VC)
Jean Smith
Jaco Williams
Janco Purchase
Litelihle Bester
Phiko Sobahle
Hakeem Kunene
Ebhentshini:
Jacques Marais
Simphiwe Ngobese
Dian Heunis
Gideon Koegelenberg
Matt Ramao
Ceano Everson
Simphiwe Moyo
Albie Bester
