AmaProteas ashaye i-England anqoba uchungechunge lweyosuku olulodwa
SIHLE NGUBO
INingizimu Afrika iphinde yanqoba olunye uchungechunge lwemidlalo yosuku olulodwa, kulandela ukushaya i-England ngàma-run amahlanu emdlalweni wesibili eLord’s Cricket Ground, eLondon, ngoLwesine.
Ukunqoba kwamaProteas bekusho ukuthi asehamba phambili ngo 2-0 kulolu chungechunge lwemidlalo yosuku olulodwa emithathu ese-England.
Ngenyanga edlule iqembu lakuleli lishaye i-Australia ngo 2-1 lakhala lemuka nochungechunge lwemidlalo emithathu.
I-England iyona ewine ithosi yakhetha ukushwiba kuqala, kwabe izosile kumaProteas.
INingizimu Afrika igcine ihlanganise ama-run angu-330, okunzima ukuwafica eLord’s Cricket Ground uyiqembu elibhetha okwesibili.
Kudlale kahle uMatthew Breetzke (85), uTristan Stubbs (58), u-Aiden Markram (49) noDewald Brevis (42).
UBreetzke ube ngumdlali wokuqala ngqa emlandweni wemidlalo yosuku olulodwa, ukuhlanganisa ama-run angu-50 kuyona yomihlanu imidlalo yakhe yokuqala.
Ngasohlangothini lwe-England kushwibe kahle uJofra Archer othathe amawikhethi amane.
I-England iqale kabi ilahlekelwa uJamie Smith ngebhola lokuqala ngqa elishwitshwe uNandre Burger.
Kungene uJoe Root ozamile ukuzimazisa isimo elekelelwa uBen Ducket, okhishwe uKeshiv Maharaj ena-14 (33).
UJacob Bethell 58 (40) uyibambe kahle noRoot kodwa wabuya uMaharaj wamkhipha (uRoot) 61 (72) zashintsha izinto.
UJos Buttler naye uke wabukeka eyingozi kakhulu kubashwibi bamaProteas, elishaya engalincengi ibhola.
Kulamule uLungi Ngidi okhiphe uButtler ena-61 emabholeni angu-51.
Liphele nya ithemba le-England uBurger ekhipha uWill Jacks ena-39 (33).
Ngaleso sikhathi i-England ibina-290/8, kucaca ukuthi kuzoba nzima ukufika ku-331. Igcine yenze 325/9.
Okwesibili kuphela iNingizimu Afrika inqoba uchungechunge lwemidlalo yosuku olulodwa e-England.
Kugcina ukwenzeka lokho kwakukudala kakhulu njengoba kwakungu-1998.
Umdlalo wokugcina wosuku olulodwa ungeSonto kanti amaProteas azoya kuwona esevele engabanqobi.
